Tuńǵysh Prezıdent mýzeıinde Qazaqstan men Japonııa arasyndaǵy «Mádenıet arqyly únqatysý» halyqaralyq jobasy aıasynda ıkebana ónerine arnalǵan mádenı shara uıymdastyryldy.
Aldymen professor So-Katoký Ikenobo atalǵan óner boıynsha sheberlik synybyn ótkizdi. Sonymen qatar qatysýshylardyń eń úzdik týyndylary kórmege qoıyldy.
Ikebana – japonnyń ejelden kele jatqan ulttyq óneri. Ol ómir saltynan alynǵan sulýlyq sımvoly, ǵasyrlar boıy qunyn joımaǵan ádemilik qazynasy bolyp tabylady. Sondyqtan da japon halqy náziktiktiń shyńy dep baǵalaǵan ıkebanany kúni búginge deıin qadir tutady.
Sheberlik sabaǵynda Reseıdegi Ikenobo fılıalynyń negizin qalaýshy ári alǵashqy prezıdenti Mıdorı Iаmada jaıly, onyń kórkem týyndylarynyń erekshe tusy aıtyldy. Iаmada Omote Senke mektebiniń shaı quıý rásimi boıynsha jáne Sýmı-e keskindemesiniń has sheberi bolyp sanalady. Ol 25 jyl ishinde Reseı, Túrikmenstan, Tatarstan, Ýkraına, Moldova, Armenııa men Qazaqstanda kóptegen kýrstar ótkizip, bul ónerdiń qyr-syryn úıretken. Al osy sharada qatysýshylar Iаmadanyń avtorlyq jumystaryn tamashalap, ıkebananyń qupııa tusyna úńilip, ózderi gúl shoqtaryn jasady. Sondaı-aq eki eldiń arasyndaǵy mádenı qarym-qatynasty nyǵaıta túsken ıkebana óneriniń tarıhy jaıly qyzyqty derekter aıtyldy. Máselen bul óner urpaqtan urpaqqa mura bolyp kele jatqandyqtan, Japonııadaǵy Rokkakýdo shirkeýiniń 45 monahyna kezeń-kezeńimen Ikenobo esimi berilgen. Al búginde atalǵan shirkeýdi Sen Eı Ikenobonyń 45-shi urpaǵy Ono no Imoko basqarady.
Talǵat RAIYMBEK,
«Egemen Qazaqstan»