Qyzyljar óńirinde baspanaly bolý baqytyna ıe bolýshylardyń qatary jyl ótken saıyn artyp keledi. Buryndary jylyna 100-120 myń sharshy metr baspana paıdalanýǵa berilse, bıylǵy meje 185 myń sharshy metrdi qurap, byltyrǵyǵa qaraǵanda 32 paıyzǵa artty. Demek, bir myńǵa jýyq otbasy qýanyshqa bólenedi degen sóz. Búgingi kúni oblys ortalyǵynan shetkerileý jerde jańadan boı kótergen «Bereke» shaǵyn aýdany qalashyqtan aýmaıdy. Munda zamanaýı talapqa saı turǵyzylǵan 15 kóp qabatty úı men 720 oryndy Nazarbaev zııatkerlik mektebi jáne mamandandyrylǵan halyqqa qyzmet kórsetý ortalyǵy erekshe sán beredi. Endi qurysh qoldy qurylysshylar jyl aıaǵyna deıin 11 kóp qabatty turǵyn úıdi paıdalanýǵa berýdi josparlap otyr. Oblys ákimi E.Sultanov ekpindi qurylys alańdarynda bolyp, máseleniń mán-jaıymen tanysty.
Qurylys nysandarynyń basym bóligi osynda ornalasqandyqtan, qadaǵalaý kúshti. 55, 75, 90 páterli úsh ǵımarattyń qurylysyn memlekettik tapsyrys sheńberinde júrgizip jatqan «PMK-5», «Osnovanıe», «Stroıkompanııa» seriktestikteriniń qımyly shıraq. Ishki árleý jumystarynyń qyzý qarqynmen júrgizilip jatqanyna qaraǵanda merziminde tapsyrylaryna esh shúbá keltirýge bolmaıdy. Jumys eki aýysymda uıymdastyrylyp, 300-deı adam tartylǵan. «PMK-5» JShS dırektorynyń orynbasary Altaı Álibaev esik, tereze jaqtaýlaryn, gaz qondyrǵylary men telefon jelilerin ornatý isimen aınalysyp jatqandaryn jetkizdi.
Bes qabatty 80 páterli turǵyn úı grafıkten kesheýildegen. Qyrkúıekte tapsyrylýǵa tıisti ǵımarattyń qurylys jumystary áli kúnge deıin birinshi qabattan joǵary kóterilmegen. Bul kóriniske kóńili tolmaǵan óńir basshysy merdiger kompanııaǵa qurylystyń qarqynyn kúsheıtýdi tapsyrdy.
Iýbıleınyı shaǵyn aýdanynda boı kótergen bes turǵyn úıdiń ekeýi tehnıkalyq qadaǵalaýdan ótip, qýanyshty kúndi 198 otbasy músheleri taǵatsyzdana kútip otyr. Budan bólek eki ǵımarat turǵyzylýda. Al, 2008 jyldan beri «saqaldy qurylysqa» aınalyp, páter kezeginde turýshylardyń zyqysyn shyǵarǵan 126 páterli 9 qabatty baspana jutynyp shyǵa kelgen.
«Zoovetsnab» JShS de qurylys aýqymyn keńeıtýmen júıeli aınalysyp keledi. Otandyq jáne Eýrazııalyq ekonomıkalyq odaqqa múshe elderde óndirilgen veterınarlyq dári-dármekterdi satýmen birneshe dúken, veterınarlyq qosyn aınalysady. Kásiporyn basshylyǵy jumysshy-qyzmetkerlerge arnap sporttyq jattyǵý zalyn iske qosqan.
Jańa qonysqa kóshken daryndy balalarǵa mamandandyrylǵan “LORD” mektep-lıseıiniń ǵımarattarynda 212 oqýshy dáris alady.
Soltústik Qazaqstan oblysy
О́mir ESQALI,
«Egemen Qazaqstan»
Sýretti túsirgen
Talǵat TÁNIBAEV