О́ńirde velosport bedeli ósip keledi

Ataqty veloshabandoz Aleksandr Vınokýrov London tórinde jeńistiń eń bıik tuǵyryna kóterilgennen keıin soltústik óńirde jerles aǵalaryna uqsaǵysy kelgen jas tolqynnyń sany kúrt artty. Qazir olardyń aldy halyqaralyq jarys­tarda top jaryp, Rıo Olım­pıadasyna qatysyp qaıtty. Biz tegeýrindi toptyń bir shoǵyryn tárbıeleýmen aınalysatyn velosporttan olımpıadalyq rezervtegi mamandandyrylǵan balalar men jasóspirimder sport mektebiniń dırektory Vladımır PARAHINGE jolyǵyp, áńgimelesken edik. ­– Vladımır Alekseevıch, búgin­de shákirtterińizdiń esim­deri álemge tanymal. Álem chempıo­nyn da qanattandyryp ushyrdyńyzdar. – Iá, 1998 jyldan beri ju­mys istep kele jatqan mektep, óńir­di aıtpaǵanda, elimizdegi velo­sporttyń damýyna zor úlesin qosyp, yntaly da talapty balalardy ózindik erekshelikteri mol sporttyń osy bir qıyn túrine talmaı baýlyp keledi. Osy jyldar bedelinde bári durys, taqtaı­daı jazyq boldy desek, eshkim sene qoımas. Júıkeni juqartatyn problemalardy bastan qansha ótkersek te, maqsatymyzdan aıny­­ǵan emespiz. Tipti, qarajat tap­­shy­lyǵy­nan mektepti ýaqytsha jabýǵa da týra kelgen. Desek te, múddeli oryndardyń túıindi máse­­le­­lerdi baıyptylyqpen sheshe bilý­diń arqa­syn­da materıaldyq-tehnıkalyq bazamyz ana­ǵurlym jaqsardy. Qazir munda 10-17 jas ara­ly­ǵyndaǵy 200-ge jýyq tár­bıe­lenýshi jattyǵady. Olardyń 12-si oblys quramasyna alynyp, baıraqty básekelerde el namysyn qorǵap júr. – Buryndary arnaıy jat­ty­ǵatyn oryndardyń jetis­peýshiliginen qınalyp júretin edińizder. Túıindi másele sheshi­min tapty ma? – Velosportshylar keshendi ári úzbeı jattyqqanda ǵana sport­tyq babyn saqtaıdy. Jaz maýsymynda Iаvlenka, Mamlıýtka, Arhangelka tasjoldaryn, Borkı kentindegi trassany paıdalanamyz. Aýlamyzda shaǵyn velodro­mymyz, «Jeńis» balalar men jas­óspirimder sport mektebinde, №17 ulttyq órkendeý mektebinde jáne Qyzyljar aýdanynda fılıaldarymyz bar. Qysta jalpy aýmaǵy 70 sharshy metrdi quraıtyn eki ból­mede syǵy­lysyp, daıyndalý jaıy qatty qınaı­tyn. Byl­tyr boı kótergen ámbebap sport saraıynan ha­lyqaralyq talaptarǵa saı jabdyq­tal­ǵan jeńil atletıka maneji men velozal beril­­di. Jer­gi­lik­ti qazynadan bólingen qara­­jat­qa 33 velotrenajer satyp alyndy. Desek te, velosporttaǵy basty problema – jol. Keı kezderi bal­ǵyn­dar bastaryn qaterge tigip, avtokóliktermen birge júrýge máj­­búr. Tasjol taqtaıdaı túzý, tegis bolsa, bir sári. Shaǵyn ǵana Bel­gııa­da 35 myń shaqy­­rym velo­jolaq bar kóri­nedi. Amanshy­lyq bol­sa, ol kúnge de jetermiz. – Sport mektebi bilikti ma­man­dar­men qansha­lyq­ty qam­ta­masyz etilgen? – Shákirtterimiz­diń kási­bı she­ber­­ligin shyń­daı otyryp, elin, jerin súıetin otanshyl azamat­tar tár­bıeleýde jattyq­tyrý­shylar­ǵa qoıylatyn talap erekshe, jaýap­ker­shilik júgi aýyr. Onyń ústine, iri jarystarda el namysyn oı­daǵy­daı qorǵaý sekildi mindetter tur­ǵa­nyn eskersek, kópjyldyq ju­mys ótili bar tájirıbeli kadrlar­ǵa aldymen arqa súıeımiz. Qazir se­giz maman jumys istese, olardyń ara­syn­da osy salaǵa shırek ǵasyr ǵumy­ryn arnaǵan Petr Netesov­tiń, Igor Zelnıkovtiń jáne Sergeı Ishımovtiń esimderin maq­tanyshpen ataýǵa bolady. Men velosportty «sporttyń tóresi» der edim. Zertteýler kór­set­kendeı, velosıpedti úzdiksiz tep­ken adamnyń ómir jasy bes jyl­ǵa uzarady. Kúızelisten arylý men jastyqty saqtaýdyń, varıkoz sııaqty aıaq aýrýlaryna qarsy qoldanylatyn birden-bir «em». Júrek, ókpe, bulshyq etter jaqsy damıdy. Mine, velosporttyń osyn­­daı artyqshylyqtaryn balalar se­zinip ósse, A.Vınokýrovtyń izin qýý­shylar qatary, sóz joq, artar edi. Áńgimelesken О́mir ESQALI «Egemen Qazaqstan»