Tatarstan ókildiginiń jańa ǵımaraty ashyldy

Keshe Astanada Tatarstannyń Qazaqstandaǵy О́kiletti ókildiginiń jańa ǵımaraty ashyldy. Ashylý saltanatyna Astana qalasynyń ákimi Áset Isekeshevpen birge, Qazaqstanǵa eki kúndik resmı saparmen kelgen Tatarstan Respýblıkasynyń Prezıdenti Rýstam Mınnıhanov qatysty. Alǵashqy sózdi Astana qala­synyń ákimi Áset Isekeshev alyp, jańa ǵımarattaǵy áriptestik eki eldiń arasyndaǵy qarym-qaty­nas­tardy tereńdete túsýge qyzmet etetindigine senim bildirdi. Mun­daı sharalar bizdiń jaqyn dosty­ǵymyzdy dáleldeıdi. Halyq­tarymyz tamyry tereńge ketken týystyq, dostyq qarym-qaty­nasta. Jańa ǵımarat ta sol úr­diske qyzmet eteri sózsiz. Son­dyqtan sizderdi jańa tabyspen quttyqtaımyn, dedi ol. Tatarstan Prezıdenti Rýstam Mınnıhanov óziniń sózinde osyndaı tamasha ǵımaratta ashylyp tyndyrymdy jumys istep otyrǵan О́kildik eki halyqtyń, eki eldiń dostyǵy men ekonomıkalyq yntymaqtastyǵyn tereńdete túsetinine senimin bildirdi. Bizder – túrki álemindegi eń jaqyn halyqtarmyz. Qazaqstanǵa kelgen saıyn sony sezinemiz. Biz Qazaq­standaǵy tatar dıaspo­ra­sy­nyń da týys­qan halyqtyń orta­synda tamash­a ómir súrip jat­qanyn jaqsy bilemiz. Olar ózderin «qazaq­standyqtarmyz» dep atap, tili men dástúrin saq­taý­ǵa mol múmkinshilik jasap otyr­ǵany úshin Qazaqstan bas­shy­lyǵyna rızashylyǵyn bildirýde. Sondyqtan da sizderge bek zýr rah­mat deımiz, dedi ol óziniń sózinde. Sonymen qatar, ǵımarattyń ashylý saltanatyna Reseı Fede­ra­sııasynyń Qazaqstan Respýb­lı­kasyndaǵy elshiliginiń keńesshisi Vıktor Nefedov te qatysyp, sóz sóıledi. Esildiń sol jaǵalaýyndaǵy «BI Village Deluxe-1» kottedjder qalashyǵynda ornalasqan bul shaǵyn ǵımarat alańsyz jumys isteýge óte  yńǵaıly. Aınalasynda kólik shýy joq, qalanyń mazasyz tirligi sezilmeıtin jaıly jerde endi Tatarstannyń qyzyl-jasyl týy jelbirep, týysqan halyqtyń bir uıasyndaı bolyp turatyn bol­dy. Aıta ketetin jaıt, Astanada Qazaqstan men Tatarstannyń saý­da-ekonomıkalyq, ǵylymı-teh­nı­kalyq jáne mádenı ynty­maq­­tastyǵyn jandandyryp otyratyn О́kildik ashý týraly birles­ken kelisimge 1997 jyldyń 25 tamy­zynda qol qoıylǵan. Bul О́kil­dik zańdy tulǵa retinde Qazaq­standa 1998 jylǵy 26 qazanda tir­kelip, ju­mys istep jatyr. Mi­ne, endi ol ja­ńa ǵımaratqa kóship otyr. Tatar­stannyń Qazaqstan­daǵy О́kil­diginiń basshysy – Rús­tem Valıýl­lov. О́kildik ǵımaratynyń ashylý saltanatyna Qazaqstandaǵy tatar etnomádenı birlestiginiń oblystardaǵy ókilderi de qatys­ty. Olar Astanaǵa Tatarstan Pre­zıdenti R.Mınnıhanovpen kezde­sýge kelgen edi. Kezdesý bir kún buryn «Qazmedıa» ortaly­ǵynda ótken bolatyn. 2009 jyl­ǵy sanaqqa qaraǵanda, qazir Qazaq­standa 200 myńnan astam tatar turady. Tatar etnomádenı birles­tikteri barlyq oblystarda ashyl­ǵan, olar eki qaýymdastyqqa birikken. Jaqsybaı SAMRAT, «Egemen Qazaqstan»