Qazaqstan Respýblıkasy Memlekettik ortalyq mýzeıi jáne «Baqyt» sándik-qoldanbaly óner ortalyǵy birlese otyryp, 2003 jyldan beri dástúrli túrde ótkizetin sándik-qoldanbaly óner kórmesine jyl saıyn 150-den astam qolónershi qatysady.
Ortalyq Azııa halyqtarynyń sándik-qoldanbaly óner kórme-jármeńkesi jylyna tórt márte ótkiziledi. Dástúrli is-sharaǵa aınalǵan kórme-jármeńkede sándik-qoldanbaly ónerdi baǵalaıtyn tutynýshylar kádesyılardy, kıiz jáne jibek buıymdardy, kilemder men zergerlik zattardy, qysh, beıneleý óneri týyndylaryn, basqa da san alýan qolóner buıymdaryn tek qana tamashalap qoımaı, satyp ala alady.
«Alma qalasy – Almaty» kórmesine kelýshilerge «alma» beınelengen bazarlyqtar men kádesyı ónimderiniń mol toptamasy usynylady. Alma álemdegi bilim, úmit, danalyq, mahabbat, otbasylyq baqyt, ana men bala, uzaq ǵumyr nyshandarynan eń tanymal sımvoldardyń biri. Sándik-qoldanbaly óner sheberleri bul nyshandardy ózderiniń týyndylarynda – kartına, zergerlik buıym, pano, gobelen, kıiz jáne teri buıymdarynda, batık sııaqty ónimderinde beınelegen. Alma beınelengen kádesyıdy kez kelgen jastaǵy janǵa syı etip tartýǵa bolady. Alma beınelengen kádesyılar molshylyq pen sáttilikti nyshandaıdy.
Ortalyq Azııa qolóner kórme-jármeńkesine kelýshiler úshin qyzyqty baǵdarlamalar uıymdastyrylǵan: has sheberlerdiń buıymdarymen tanysý, qyshtan buıymdar jasaý boıynsha sheberlik-sabaǵyn ótkizý, ártúrli shyǵarmashylyq ujymdardyń konserttik baǵdarlamasy, sándik-qoldanbaly óner sheberleriniń qatysýymen lotereıalyq utys oıyndary oınatylady. Baý-baqsha ósirýshiler ǵajaıyp alma jármeńkesin usynady. Mýzeıdiń kınozalynda Almaty qalasy tarıhyna arnalǵan mýzeı qoryndaǵy fotomaterıaldar kórsetiledi.
Kórme-jármeńkege kirýdegi bılettiń serııa nómiri utys lotereıa oıyndarynyń nómiri bolyp tabylady.
Aıgúl AHANBAIQYZY,
«Egemen Qazaqstan»
ALMATY