Keshe Parlament Senatynyń Tóraǵasy Qasym-Jomart Toqaev EQYU-nyń Is basyndaǵy tóraǵasy – Lıtva Respýblıkasynyń syrtqy ister mınıstri Aýdronıýs Ajýbalıspen kezdesti, dep habarlady osy palatanyń baspasóz qyzmeti.
Kezdesý barysynda 2011 jylǵy Lıtva tóraǵalyǵyndaǵy basymdyqtar, sondaı-aq ekijaqty jáne kópjaqty turpattaǵy parlamentaralyq ózara is-qımyl máseleleri talqylandy.
Q.Toqaev 2010 jylǵy Qazaqstan tóraǵalyǵy kezindegi basymdyqtar men bastamalardy qoldaýǵa oraı rızashylyq bildire otyryp, «Helsınkı aktisinde aıtylǵan erejeler men qaǵıdalar qaıta naqtylanyp, qabyldanǵan Astana Deklarasııasy kúlli EQYU qoǵamdastyǵyndaǵy zor jetistik bolyp tabylady», dedi. Tóraǵa sondaı-aq «Biz lıtva tóraǵalyǵynyń baǵdarlamasyn qoldaımyz jáne Uıymnyń tıimdiligin kúsheıtý jónindegi josparlardy oryndaýǵa járdemdesýge ázirmiz», dedi.
EQYU, Eýropa Keńesi jáne NATO Parlamenttik assambleıalary sekildi iri parlamentaralyq uıymdar aıasynda Qazaqstan men Lıtva depýtattarynyń yntymaqtastyǵy jalǵasyp kele jatqany týraly atap ótken Tóraǵa ózara memleketaralyq baılanystyń mańyzdy quramy – parlamentaralyq únqatysýdy odan ári belsendilendirýdi jaqtaıtynyn aıtty.
Q.Toqaev Lıtva Seıminiń Tóraǵasy Irena Degýtenege qolaıly ýaqytta Qazaqstanǵa kelýge shaqyrýyn jetkizdi.
Bıylǵy 3 sáýirde Qazaqstanda bolatyn prezıdenttik saılaýǵa qatysty Senat Tóraǵasy: «Biz halyqaralyq standarttarǵa saı ashyq jáne ádil saılaý ótkizýdi tolyq qamtamasyz etemiz», dedi. Tóraǵanyń aıtýynsha, saılaýdy baıqaý jónindegi mindetterdi oryndaý úshin barlyq qajetti jaǵdaı jasalatyn bolady.
Qazaqstannyń EQYU-ǵa tóraǵalyq etýiniń nátıjelerin joǵary baǵalaı kelip, A.Ajýbalıs «Uıymnyń joǵary laýazymynda Lıtva Qazaqstandy zor odaqtas retinde tanıdy», degen pikir bildirdi.
Onyń aıtýynsha, Islam Konferensııasy Uıymyna bizdiń elimizdiń tabysty tóraǵalyq etetinine kúmán joq, óıtkeni «Qazaqstannyń ózin jaqsy jaǵynan kórsetýine jáne aımaqqa úlgi bolýǵa áleýeti de, múmkindikteri de jetedi».