Keshe Qazaqstan Parlamenti Májilisiniń Tóraǵasy Oral Muhamedjanov EQYU-nyń Is basyndaǵy tóraǵasy – Lıtva Syrtqy ister mınıstri Aýdronıýs Ajýbalıspen kezdesti.
О́z sózinde meıman 2010 jyly Qazaqstan EQYU-ǵa tóraǵalyq etý mindetin joǵary deńgeıde atqaryp shyqqanyn atap ótti. Qazaq eliniń ıgi bastamalary jalǵasyn taýyp jatqanyn málimdedi. Qazaqstannyń, ásirese, Moldova men Qyrǵyzstanǵa qoldaý bildirýdegi belsendiligin erekshe aıtýǵa bolady. Sonymen birge esirtkige qarsy kúresti kúsheıtý maqsatynda Aýǵanstanmen kórshiles elderdiń shekaralaryn nyǵaıtý máselelerin sóz etti.
A.Ajýbalıs Qyrǵyzstandaǵy turaqtylyqty qalyptastyrý máseleleri kún tártibinde turǵanyn, osy oraıda óziniń sol elge saparmen baratynyn jetkizdi.
Májilis Tóraǵasy EQYU-nyń negizgi úsh ólshemi boıynsha júrgizilip jatqan jumystardyń ózektiligin aıtyp ótti. Sondaı-aq Qazaqstan Parlamentiniń qarjy daǵdarysyna qarsy qabyldaǵan zańdary, el táýelsizdiginiń 20 jyldyǵyn laıyqty atap ótý baǵytyndaǵy daıyndyq barysy týraly oılarymen bólisti.
Kezdesýde taraptar Qazaqstan men Lıtva arasyndaǵy yntymaqtastyq týraly pikir almasty. Eki el dostyq baılanysty damytýǵa yntaly. Oral Muhamedjanov, ásirese, kólik jáne ekonomıkanyń agrarlyq salasyn damytýda eki jaqqa da tıimdi kelisimderdi júzege asyrýǵa bolatynyn aıtty.
«Egemen-aqparat».