Parlament Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva NATO Bas hatshysynyń Ortalyq Azııa jáne Kavkaz jónindegi Arnaýly ókili Djeıms Appatýraımen kezdesti. Kezdesýge senatorlar Ikram Adyrbekov jáne Muhtar Altynbaev qatysty, dep habarlady Senattyń baspasóz qyzmeti.
D.Nazarbaeva NATO-men áriptestikti damytý Qazaqstannyń syrtqy saıası baǵytyndaǵy mańyzdy basymdyq ekenin atap ótti.
Áńgime barysynda qorǵanys jáne qaýipsizdik salasyndaǵy ulttyq áleýetin nyǵaıtýǵa, aımaqtyq turaqtylyqqa tónetin qaterler men qaýipterge qarsy is-qımylǵa járdemdesetin Soltústik Atlantıka alıansynyń qazirgi kezdegi baǵdarlamalary men úzdik tájirıbesin tartýǵa bizdiń elimizdiń múddeli ekeni atap ótildi.
NATO Bas hatshysynyń Arnaýly ókili Qazaqstan men Soltústik Atlantıka alıansy arasyndaǵy ózara is-qımyldy, elimizdiń bitimgerleriniń daıyndyq deńgeıin oń sıpattaı otyryp, Qazaqstannyń jahandyq dıplomatııadaǵy rólin joǵary baǵalady.