Tuǵyrda – Qurmanǵazy men Dına

Eskertkishter – eldiktiń belgisi. Respýblıkamyzdyń batys qaqpasyndaǵy halqymyzdyń  erkindikke qol jetkizýin basty maqsat-murattaryna aınaldyrǵan  tarıhı tulǵalarǵa qoıylǵan tuǵyrlar taǵy bir qaıtalanbas músin óneri týyndysymen tolyqty. Bul – Oral qalasynda kúı atasy Qur­­­manǵazy men kúı anasy Dına kó­sheleriniń qıylysqan jerindegi demalys orny aýmaǵyna ekeýine ornatylǵan kompozısııalyq eskertkish jobasy. Eskertkish qurylysyn iske asyrǵan oblysqa tanymal kásipkerlerdiń biri – Erlan Ǵaısın. Oral óńiri – Qurmanǵazy men Dına­nyń tarıhı otany, kir jýyp, kindik kesken topyraǵy. Soǵan qa­ra­mastan, munda ekeýine eskertkish qoı­ylmaı kelgeni rýhanı olqylyqtaı, táýelsiz elimizge syndaı  kórinýshi edi. Osynyń orny tolǵany anyq. О́ıtkeni, olar­dyń shyǵarmalaryna negizinen eldikti tý etip kóterý, erkindik pen bos­tandyqty jáne azat ómirdi ańsaý sıpaty tán bolyp kelgeni atar tańdaı, ba­tar kúndeı shyndyq. Sondyqtan el táýelsizdiginiń 25 jyldyq mereıli merekesi qarsańynda ashylǵan bul kom­pozısııalyq músinder kesheniniń búgingi ur­paqqa berer tálimi men taǵylymy mol bolmaq. Ekinshiden, Qurmanǵazy men Dınaǵa eki bólek eskertkish qoımaı, ony bir­tu­tas bólinbes kompozısııalyq mú­sin týyndysy retinde ornatý jónindegi almatylyq músinshi Mu­rat Mansurovtyń shyǵarmashylyq she­shimi tek quptaý men qoldaýǵa laıyq­ty. Ári ekeýiniń birneshe márte kez­deskeni, Qurmanǵazynyń Dınaǵa ózim­niń izbasarym dep batasyn bergeni, dom­byrasyn syılaǵany tarıhı derekter­den jaqsy málim. Buǵan qosa, osy ara­da qazaqtyń kúı óneri men onyń shyǵý tarıhyn indete zerttegen taǵy bir tarıhı tulǵa, búgingi Qurmanǵazy atyndaǵy ult aspaptar orkestrin óz qolymen qurǵan halqymyzdyń talantty uly Ahmet Jubanov «Qurmanǵazy aıtypty» degen tómendegideı derekti de oqyrmandar nazaryna bere ketkenniń artyqshylyǵy joq. Naqtyraq aıtqanda, qaıran Qurman­ǵazy babamyz bylaı degen eken: «eger me­niń oń qolym men Dınanyń sol qoly bir adamǵa berilse, bul dúnıede odan asqan dúldúl dombyrashy men kúıshi bolmas edi». Mine, bul tarıhı derektiń ózi de Qurmanǵazy men Dınanyń jıi kezdeskeninen habar bere alady. Ári ekeýi bir-biriniń kúı tartý mánerindegi artyqshylyǵy men olqylyǵyn jaqsy bilgendigin kórsetedi. Temir QUSAIYN, «Egemen Qazaqstan» Batys Qazaqstan oblysy Sýretti túsirgen Aıbatyr NURASh