Qazaqstan Respýblıkasynyń Memlekettik hatshysy Gúlshara Ábdiqalyqova Germanııa Federatıvtik Respýblıkasy Parlamenti Býndestaginiń depýtaty Sıbılle Pfaıfermen kezdesti, dep habarlaıdy Aqordanyń baspasóz qyzmeti.
Áńgimelesý barysynda G.Ábdiqalyqova Qazaqstan Táýelsizdiginiń 25 jyldyq mereıtoıyn qarsy alýǵa daıyndalyp jatqanyn atap ótti. Tarıhı ólshemmen alǵanda, elimiz qysqa merzim ishinde eleýli nátıjelerge qol jetkizdi jáne búgingi tańda Qazaqstannyń aldynda álemniń eń damyǵan 30 eliniń qataryna qosylý maqsaty tur. Osy mindetke qol jetkizý úshin Qazaqstan Prezıdenti Bes ınstıtýsıonaldyq reforma men «100 naqty qadam» ult josparyn usyndy.
Memlekettik hatshy Germanııa Qazaqstannyń Eýropalyq Odaqtaǵy basty seriktesi ekenin aıtty. Kelesi jyly elderimiz arasyndaǵy dıplomatııalyq qatynastyń ornaǵanyna 25 jyl tolady. Kezdesý barysynda Qazaqstan men Germanııa arasyndaǵy ekonomıkalyq, áleýmettik-mádenı ózara is-qımyl jóninde birqatar ózekti másele talqylandy. Taraptar qazirgi saýda-ekonomıkalyq jáne ınvestısııalyq baılanystardyń damý qarqyny qanaǵattanarlyq ekenin atap ótti.
Qazaqstan men GFR arasyndaǵy taýar aınalymy 2016 jylǵy qańtar-tamyz aralyǵynda 1,2 mlrd dollar boldy. Qazirgi ýaqytta Qazaqstan jaǵy men LANXESS, GEA, BASF, DACHSER, BAYWA sııaqty jetekshi nemis kompanııalary qurylys, hımııa, farmasevtıka, mashına jasaý, energetıka, aýyl sharýashylyǵy ónimderin qaıta óńdeý, metallýrgııa jáne kólik-logıstıka salasynda ınvestısııalyq jobalardy júzege asyrý jóninde kelissózder júrgizýde. Taraptar Qazaqstan Respýblıkasy men EO arasyndaǵy keńeıtilgen seriktestik jáne yntymaqtastyq týraly kelisimdi iske asyrý máselesine erekshe nazar aýdardy. Sondaı-aq, kezdesý barysynda áıelderdi jan-jaqty qoldaý jáne BUU-nyń Ornyqty damý maqsattaryn iske asyrý máseleleri talqylandy.
Memlekettik hatshy Býndestag depýtatyna Astanada ótetin «EKSPO-2017» halyqaralyq kórmesine daıyndyq jóninde málimdedi. G.Ábdiqalyqova 2017 jylǵy 12 shildede Qazaqstannyń GFR-den keletin, Germanııanyń ulttyq pavılonynyń ashylýyna qatysatyn mártebeli meımandardy kútetinin aıtty. Sońynda Memlekettik hatshy Qazaqstan men Germanııa arasyndaǵy dıalog pen ózara túsinistikti nyǵaıtýǵa yqpal etkeni úshin S.Pfaıferge rızashylyǵyn bildirdi.