Qazaqstan sportshylary Rıo Olımpııalyq oıyndary men Paralımpıadasynda tarıhta tuńǵysh ret altyn medal jeńip alǵannan keıin elimizde sý sporty túrlerine degen ynta-yqylas kúrt arta tústi. Bul burnaǵy kúni Almatyda ótken respýblıka sý sporty túrleri federasııasynyń 6-shy esep berý-saılaý konferensııasynda da erekshe atap kórsetildi.
Konferensııada federasııanyń basshysy ózgerdi. Jıynǵa qatysýshylar onyń jańa prezıdenti etip Tımýr Qulybaevty bir aýyzdan saılady. Ol bul qyzmetti 2008 jyldan beri atqaryp kelgen Temirhan Dosmuhambetovti almastyrdy.
Tımýr Qulybaev sonymen qatar, Azııa Olımpııalyq keńesiniń vıse-prezıdenti, Qazaqstan Respýblıkasy Ulttyq olımpııalyq komıtetiniń prezıdenti, Qazaqstan Boks federasııasynyń prezıdenti bolyp tabylady. Al Qazaqstan Jekpe-jek urystary federasııasynyń prezıdenttiginen jaqynda ózi bosady. Onyń usynysy boıynsha bul orynǵa Danııar Abýlǵazın saılandy.
Jıynda Tımýr Qulybaev federasııanyń jumysy týraly esep berýshilerge búginde jurttyń bárine belgili bolyp otyrǵan sońǵy jyldardyń tabystary jaıly qazbalaı bermeı, máseleniń jaqyn arada federasııanyń aralasýymen sheshilýdi tileıtin problemalyq jaqtaryna kóbirek nazar aýdarýdy surady. Osydan keıin sóıleýshiler saladaǵy materıaldyq-tehnıkalyq bazanyń nasharlyǵy nemese onyń múlde joqtyǵy, maman kadrlardyń tapshylyǵy jáne qarjy jetispeýshiligi týraly sóz qozǵady.
Tımýr Asqarulynyń aıtýynsha, Qazaqstanda sý sporty túrlerin damytýdyń uzaq jyldarǵa arnalǵan baǵdarlamasy bolýǵa tıis. Onda sportshylardy daıarlaýdyń bastapqy kezeńiniń rólin kóterý, respýblıka aımaqtarynda, birinshi kezekte Astana jáne Almaty qalalarynda tıisti sport ǵımarattaryn salý, sý sporty túrlerin damytý jumysyna bıznes qurylymdaryn tartý máseleleri qarastyrylýy kerek.
Konferensııaǵa Mádenıet jáne sport mınıstri Arystanbek Muhamedıuly qatysty.
Serik PIRNAZAR,
«Egemen Qazaqstan»