Avstrııadaǵy Forarlberg federaldy jeriniń ákimshilik ortalyǵy Bregens qalasynda Qazaqstan Respýblıkasy Qurmetti konsýldyǵynyń saltanatty ashylý rásimi ótti, dep habarlaıdy egemen.kz Syrtqy ister mınıstrligine silteme jasap.
Is-shara Qazaqstan Respýblıkasy Táýelsizdiginiń 25 jyldyǵyn toılaý aıasynda jáne qazaqstan-avstrııa dıplomatııalyq qarym-qatynastarynyń ornatylýyna 25 jyl tolý qarsańynda ótkizildi.
Qazaqstannyń Avstrııa Respýblıkasyndaǵy elshisi Qaırat Sarybaı Qurmetti konsýldyqtyń qurylýy ekijaqty baılanystardyń odan ári nyǵaıýyna yqpal etetinin atap ótti.
Dıplomat qazaqstandyq taraptyń Forarlbergpen yntymaqtastyqty tereńdetýdegi qyzyǵýshylyǵyn jetkizdi. Atap aıtqanda, ol osy óńirdiń metall óńdeý, mashına jasaý, elektronıka, toqyma jáne tamaq ónerkásibi salalaryndaǵy óziniń damyǵan ınnovasııalyq jáne eksportqa baǵdarlanǵan ındýstrııasymen belgili ekenin aıtty.
Forarlberg jer úkimeti tóraǵasynyń orynbasary Karlhaıns Rıýdısser óz kezeginde federaldy jer men Qazaqstan arasyndaǵy saýda aınalymynyń edáýir óskenin atap ótti.
Qazaqstan Respýblıkasynyń Qurmetti konsýly Hanno Ýlmer osy óńirde Qazaqstannyń múddelerin tanytýǵa joǵary senim úshin alǵys bildirdi jáne eki memleket pen halyqtardyń ıgiligi úshin bar bilimi men tájirıbesin jumsaıtynyn aıtty.
Qurmetti konsýldyqtyń ashylýy aıasynda Bregens qalasynyń «Festspielhaus» mádenıet ortalyǵynda Avstrııa men Eýropada qazaqstandyq mádenıetti odan ári tanymal etý maqsatynda, Qazaqstan Táýelsizdiginiń 25 jyldyǵyna arnalǵan «Qazaqstan qazynasy – Uly Dala áýenderi» jobasynyń konserti ótti. Qonaqtardyń aldynda «Young Eurasian Soloists Orchestra» kameralyq orkestri óner kórsetti. Onyń negizin qalaýshy jáne jetekshisi halyqaralyq baıqaýlardyń laýreaty – Shernııaz Musahan. Kópshilik nazaryna álemdik klassıkalyq mýzyka men belgili qazaq kompozıtorlarynyń týyndylary usynyldy.