Oblys ákimdiginde ótken toǵyz aıdyń qorytyndylaryna arnalǵan alqaly jıynǵa barlyq deńgeıdegi ákimder, memlekettik organdardyń basshylary, shaǵyn jáne orta bıznes ókilderi, iri kompanııalardyń jetekshileri qatysty. Onda ekonomıkanyń egiz salasy – ónerkásip pen aýyl sharýashylyǵynyń damý baǵyttary jáne ózekti máseleleri talqylanyp, áńgime ózegine aınaldy.
Jıyndy kirispe sóz sóılep ashqan oblys ákimi Berdibek Saparbaev qatysýshylar nazaryn áli de bolsa negizgi salalardyń kórsetkishteri tómen ekendigine, múmkindikter men rezervterdiń tıimdi paıdalanylmaı otyrǵanyna, ekonomıkalyq taldaýdyń, baqylaý men tıimdilikti esepteýdiń jetispeıtindigine aýdardy.
О́ńirdiń ónerkásip salasyndaǵy atqarylǵan jumystar týraly baıandaǵan oblys ákiminiń orynbasary Asqar Bıahmetov esepti merzim ishinde ónerkásip ónimderin óndirý kólemi 844,2 mıllıard teńgeni quraǵanyn, ónim kólemi ındeksi ótken jyldyń osy kezeńimen salystyrǵanda, 97,5 paıyz bolǵanyn jetkizdi. Atalǵan kórsetkishterdiń tómendeýi Shalqar, Muǵaljar, Temir, Baıǵanın jáne Hromtaý aýdandarynda oryn alyp otyrǵanyn atap ótti. Naqty aıtqanda, munaı, metall rýdalaryn óndirýde, taý-ken ónerkásibiniń basqa da salalarynda, taý-ken óndirisi ónerkásibi salasyna tehnıkalyq qyzmet kórsetý baǵytynda burynǵymen salystyrǵanda baıaýlyq baıqalýda. О́ńdeýshi ónerkásipte 245,1 mıllıard teńgeniń ónimi óndirildi.
Ústimizdegi jyly óńirlik kásipkerlikti qoldaý kartasy aıasynda jalpy somasy 6,5 mıllıard teńgege 4 jobany ıgerý qolǵa alyndy. Osy oraıda, úsh júzden astam jumys oryndary quryldy. «Saılan Aqtóbe» JShS «Hromıks» pıgmentti-toltyrǵysh pen magnezıaldy untaqtyń 6 myń tonnasyn shyǵarý múmkindigine ıe seh jobasyn qolǵa aldy. «Tehnodom ST-KZ» JShS tirkeme tehnıkasyn shyǵaratyn zaýytty keńeıtýde. Bul jobanyń quny 600 mıllıon teńge quraıdy. «QazInRýsstreıdıng» JShS-niń az tonnaly munaı óńdeýshi zaýyty men nemis tehnologııasy boıynsha jumys isteıtin úı qurylysy kombınaty óńir ónerkásibin damytýǵa serpin beredi dep kútilýde.
Shaǵyn jáne orta bıznes damytylýda. Bul salada eńbek etetinder sany 51 myń birlikti quraıdy, al bólshek taýar aınalymy kólemi 215,7 mıllıard teńgege jetti.
Oblys boıynsha jumyssyzdyq deńgeıi qazirgi ýaqytta 4,9 paıyzdy qurap otyr. 21672 adam jumyspen qamtamasyz etildi. Jergilikti bıýdjet qarjysy esebinen 7604 adam qoǵamdyq jumystarǵa tartyldy.
Oblys ákimi Berdibek Saparbaev alqaly jıyndy qorytyndylaı kele, ónerkásip salasynda eseptiliktiń tómendigin, sondaı-aq, ındýstrııalyq aımaqtyń múmkindigi tıimdi paıdalanylmaı otyrǵanyn synǵa aldy. Qol qoıylǵan memorandýmdardy ilgeri aparýǵa baqylaý jetispeıtindigine, shaǵyn jáne orta bıznes nysandarynda ashyqtyqtyń qamtamasyz etilmeıtinine, salyqtan jaltarýshylyq kezdesip qalatynyna, ınvestısııa tartý kózderin tabýdyń kóńildegideı bolmaı otyrǵanyna nazar aýdardy.
Ol aýyl sharýashylyǵy salasynda maldyń ósýi oǵan bólingen memlekettik qoldaý qarjylarynan anaǵurlym keıin qalyp otyrǵany saladaǵy alǵa basýshylyqty tejep otyrǵanyn atap ótti. «Sybaǵa», «Altyn asyq», «Qulan» jáne «Yrys» memlekettik baǵdarlamalarynyń múmkindikterin áli de bolsa jetkilikti túrde paıdalana almaı otyrǵanyna qynjylys bildirdi. Súdiger jyrtý jáne kúzgi daqyldardy egýde baıaýlyq bar ekenin de jasyrmady.
Alystaǵy aýyldarǵa baǵdarlamanyń mán-maǵynasy jetkizile bermeıdi, túsindirý jumystary nashar, degen Berdibek Máshbekuly aýdandarda óńdeý kásiporyndarynyń jumys istemeıtindigin de synǵa aldy.
О́ńir basshysynyń talap pen tártipti birinshi kezekke qoıýy bosańsyp ketkenderdi shıraq qımyldap, izdenispen jumys isteýge yqpal etedi degen úmitpen tarasty jurt.
Satybaldy SÁÝIRBAI,
«Egemen Qazaqstan»
Aqtóbe oblysy