Álemge ataqty ǵalym, brıtanııanyń astrofızıgi Stıven Hokıng Tarazda turatyn 14 jastaǵy Isaak Mýstopýlomen 2017 jyldyń 23 qańtarynda kezdesetin boldy. Bul týraly Brıtanııa keńesindegi derekke súıene otyryp, "CentrAsia Group" JShS kompanııalar tobynyń damý jónindegi dırektory Jumataı Sálimov málim etti, dep habarlaıdy QazAqparat.
Sal aýrýyna shaldyqqan Isaak Taraz qalasyndaǵy №13 mektepte oqıdy. Biraq, syrqatyna qaramastan ol 2015 jyly oqýshylar arasyndaǵy ulttyq ınnovasııalar konkýrsynyń arnaıy syılyǵyna ıe boldy. Sodan beri Isaakty Qazaqstannyń túkpir-túkpiri, tipti, sheneýnikter de tanyp, bile bastady. Sol kezde Investısııalar jáne damý mınıstrligin basqarǵan Áset Isekeshev te Isaakpen tanysyp, onymen túsken sýretin búkil áleýmettik jelige taratqan bolatyn.
NATR men Qazaqstandaǵy Brıtanııa keńesi uıymdastyrǵan oqýshylar arasyndaǵy ınnovasıalar konkýrsyna ótinim bergen kezde, Isaak óz beınerolıgi arqyly «Garmon teorııasy» atty jobasyn usyna otyryp, ataqty Stıven Hokıngpen kezdesýdi armandaıtynyn aıtqan edi. Jarystyń uıymdastyrýshysy bolǵan Tehnıkalyq damý jónindegi ulttyq agenttiktiń sol kezdegi tóraǵa orynbasary qyzmetin atqarǵan Jumataı Sálimov jas balanyń armanyn oryndaý úshin barymdy salamyn dep ýáde bergen bolatyn.
Al, óte aýyr amıotrofıkalyq skleroz aýrýyna shaldyqqan Stıven Hokıngti tanystyrýdyń da qajeti joq. Ol qazir Kembrıdj ýnıversıtetiniń professory, aǵylshynnyń ataqty ǵalymy. 18 jasynda Stıven Hokıngtiń densaýlyǵynda amıotrofıkalyq sklerozdyń alǵashqy belgileri bilene bastaıdy da, kóp uzamaı ol múlde sal dertine shaldyǵady. Tamaǵyna jasalǵan operasııadan keıin 1985 jyly ol sóıleý qabiletinen aıyrylady. Dostary oǵan sóıleýge múmkindik beretin sıntezator syılaıdy. Stıv tek oń qolyndaǵy silteýshi saýsaǵymen qımyldata alady. Soǵan qaramastan, ǵylymnan qol úzbeı, kitap jazyp, tipti 2009 jyly ǵaryshqa ushyp kelgen.