Elordadaǵy Ortalyq kommýnıkasııalar qyzmetinde ótken brıfıngte Memleket qaıratkeri, fılologııa ǵylymdarynyń doktory, professor Myrzataı Joldasbekov kitapqa qatysty oılaryn bildirdi.
«Almatydaǵy QazGÝ-ge túsken soń kitapqa shóldep kelgen bizder sol kezdegi Pýshkın atyndaǵy kitaphanaǵa aǵylatynbyz. Kitap súıer jastar ol kezde kitaphanada tanysatyn. Eńbek eri, dańqty aqyn aǵalaryń Oljas Súleımenovpen men kitaphanada tanysqanmyn. Mine, sodan beri qansha jyldar ótse, de bir-birimizden aırylǵanymyz joq. Dos, ini-baýyr bop aralasyp kelemiz. Biz barlyq ónegeni kitaptan aldyq»-dedi Myrzataı Joldasbekov. Ol órkenıetti elderde tanymal kitaphanalardyń kópshiligi jeke kitaphanalardan quralǵanyn aıtyp, ataqty Aleksandrııa kitaphanasyn mysal etti.
Bul oraıda ol óziniń 9 jarym myńnan asa kitabyn Ulttyq akademııalyq kitaphanaǵa ótkizgenin, qalamgerler tarapynan osyndaı qozǵalystyń bastalǵanyn aıtty. Qadyr Myrzalıevtiń jeke kitaphanasy Oralǵa, Qaltaı Muhamedjanovtyń jeke kitaphanasy Qyzylordaǵa ketkenin, sondaı-aq, jaqyn kúnderde Ábish Kekilbaevtyń jeke kitaphanasy Aqtaýǵa attanatynyn, sol jaqta jazýshyǵa arnalǵan úlken ortalyqtyń ashylatynyn jetkizdi.
«Men dúnıe jınaǵanym joq. Kitap jınadym. Aldymyzdaǵy aǵalarymyzdyń barlyǵy kitap arqyly ósip óndi»-degen professor qazirgi qoǵamǵa qarap ýaıymdaıtynyn, jastardyń, balalardyń qolynan telefon túspeıtinin, adamdardyń bir-birimen sóılesýden qalyp bara jatqanyn aldyǵa tartty. Sheshen halyqtyń urpaǵy tilden qala ma, ekrannan shashyraıtyn zııandy sáýlelerdiń saldarynan kózden qala ma dep ýaıymdaıtynyn ashyq aıtty.
Aıgúl SEIILOVA