Almatydaǵy ál-Farabı atyndaǵy Qazaq ulttyq ýnıversıtetinde «Aq jol» partııasynyń tóraǵasy, atalǵan partııanyń Májilistegi fraksııasynyń jetekshisi Azat Perýashevtyń «Pikirtalasty ekonomıka» atty jınaǵynyń tusaýkeseri ótti.
Partııa jetekshisi óziniń jańa jınaǵynda 2011-2015 jyldar aralyǵyndaǵy jazbalaryn, buqaralyq aqparat quraldaryna bergen maqalalary men suhbattaryn toptastyrypty.
Ulttyq ýnıversıtette ótken kitap tusaýkeserinde fılosofııa jáne saıasattaný, ekonomıka, tarıh, zań fakýltetteriniń stýdentteri saıasatkerdiń jańa jınaǵyna qyzyǵýshylyq tanytty. Aldymen tusaýkeserde saıasatta óz pikirin sońyna deıin qorǵaı alatyn memleketshil azamattyń jańa kitaby jastarǵa qandaı paıdasy bar, bolashaq mamandarǵa baǵdary bar ma degen saýalǵa jaýap izdeldi.
Elimizdegi úsh birdeı ýnıversıtettiń professory bolyp tabylatyn avtordyń «Pikirtalasty ekonomıka» kitabyna negizinen naryqtyq reformalardyń jaıy, jeke bıznesti damytý men qorǵaýdyń joldary ózek bolǵan. Osy turǵydan alǵanda táýelsizdikti bekemdeý men ulttyq múddelerdi alǵa jyljytýǵa da múddeli ekonomıka kózdegen maqsatqa qandaı demokratııalyq tetikter arqyly qol jetkizýge bolatyny jınaqta jetkilikti baıandalady.
Sol sııaqty avtordyń Parlament otyrystaryndaǵy kásibı turǵydaǵy kózqarastary men sheshendiktiń úlgisindeı baıandamalary talaı pikirtalasqa qozǵaý saldy. Kitaptaǵy pikir qarama-qaıshylyqtary, lıberaldyq qundylyqtarǵa qyzmet etý úlgileri – memlekettiń qalyptasýy men zamanaýı Qazaqstannyń ekonomıkalyq úderis joldaryn oqyp jatqan stýdentter úshin de, saıası partııalardyń shejiresi úshin de qyzyqty bolǵany sózsiz. Sondyqtan da bıznestiń de jaıyn meńgergen, saıasatty da bes saýsaǵyndaı biletin avtorǵa ýnıversıtet stýdentteri ǵana emes, oqytýshylary tarapynan da suraqtar men usynystar kóp boldy.
Kitaptyń tusaýkeserinde sóz alǵandardyń ishinde «Pikirtalasty ekonomıka» kitabyn oqyp, talqylaýǵa daıyn kelgender tabyldy. Máselen, ýnıversıtettiń halyqaralyq qatynastar fakýltetiniń professory Málik Aýǵan kitapta jarııalanǵan materıaldardyń qaı-qaısysy da ózekti deıdi. Onyń oıynsha, jańa jınaqtyń ereksheligi, Parlamenttiń ishki ómirin de órnekteıdi. Sol sııaqty saıasattaǵy kishi partııalardyń atqaratyn róli, qosyp jatqan úlesi az emes desek, onyń dáleli de qolymyzdaǵy osy jınaq dedi tarıh ǵylymdarynyń doktory Málik Álshiorazuly.
Kitap tusaýkeserinde ýnıversıtettiń tarıh fakýltetiniń professory Amanjol Qalysh, fılosofııa fakýltetiniń professory Gúljıhan Nurysheva óz pikirlerin ortaǵa saldy. Máselen, Gúljıhan Jumabaıqyzy kitapqa ǵana qatysty emes, avtordyń adam retindegi de jastarǵa ónege bolatyndaı, ózi syrttaı syralǵy jaqsy qasıetin mysalǵa keltirgeni jastar úshin úlgi sóz edi.
Kezdesý sońyna qaraı ýnıversıtet stýdentteri saıasat pen ekonomıkaǵa, áleýmettik jumyskerlerdiń bedelin kóterýge, shaǵyn jáne orta bıznesti damytýǵa, jastardyń memlekettik qyzmetke kelýine baılanysty san qyrly saýaldaryn qoıýǵa múmkindik aldy. Sol sııaqty nege jastar saıası partııalarǵa múshe bolýǵa asyqpaıdy syndy suraqtar talqylandy.
Jańa kitaptyń aldaǵy kúnderi elimizdiń basqa aımaqtaryndaǵy joǵary oqý oryndarynyń stýdentteri arasynda tusakeseri ótip, talqylanbaq.
Aınash ESALI,
«Egemen Qazaqstan»
ALMATY