Astanada Ujymdyq qaýipsizdik sharty uıymyna múshe memleketterdiń esirtkiniń zańsyz aınalymyna qarsy is-qımyl jónindegi quzyretti organdary basshylarynyń qatysýymen Úılestirý keńesiniń 18-otyrysy ótti. Oǵan UQShU Hatshylyǵynyń ókilderi men Reseı, Armenııa, Belarýs, Qyrǵyzstan, Tájikstan jáne Qazaqstan elderiniń esirtkige qarsy vedomstvolarynyń mamandary shaqyryldy.
Jıynǵa jetekshilik etken Qazaqstan Respýblıkasynyń Ishki ister mınıstri Qalmuhambet Qasymov mundaı basqosý nátıjesinde, áriptestik baılanystar men praktıkalyq deńgeıde turaqty ári iskerlik yntymaqtastyq qalyptastyrýda taptyrmas aýra bolatyndyǵyn atap ótti. «Ásirese, jedel aqparat almasa otyryp, aýqymdy jáne aýmaqtyq shuǵyl izdestirý sharalaryn ótkizý kezinde ózara is-qımyl jasasýǵa zor múmkindikter beredi. Mysaly, UQShU qoldaýymen jyl saıyn «Arna» jedel-profılaktıkalyq sharasyn utymdy uıymdastyrýdyń arqasynda biz Qazaqstan boıynsha orta eseppen 3 myńǵa jýyq esirtki qylmysyn áshkerelep otyrmyz. Olardyń jalpy jıyntyq kórsetkishi 30 tonna esirtki zattary men 150 keli geroındy quraıdy», dedi Q.Qasymov.
Basqosýdaǵy talqylaý barysynda sońǵy jyldary shegýge arnalǵan túrli qospalar men spaıstardyń da beleń alyp bara jatqany aıtyldy. Osy máselege qatysty óz oıyn bildirgen Reseı Ishki ister mınıstriniń orynbasary Igor Zýbov psıhotroptyq taýarlardyń jańa túrin tanyp-bilýde quqyq qorǵaý organdary ákki qylmyskerlerden keıin júretindigin málimdedi. Osy oraıda, atalǵan máselege qatysty Uıym músheleri qyrkúıekte Sankt-Peterbýrg qalasynda mańyzdy sheshimder qabyldaǵanyn da aıta keteıik. Ishki ister mınıstrleri keńesiniń otyrysynda TMD-ǵa qatysýshy memleketterdiń esirtki quraldarynyń, psıhotroptyq zattar men olardyń prekýrsorlarynyń zańsyz aınalymyna qarsy kúrestegi yntymaqtastyǵy týraly kelisimge birqatar sáıkes túzetýler engizildi.
Jıynda UQShU-ǵa múshe memleketterdegi esirtki ahýalynyń ózgerýindegi negizgi úrdisterin taldaý men aıqyndaýǵa, keler jyly osy jaǵdaıdyń qandaı bolaryn boljaýǵa baılanysty birqatar ózekti máseleler de talqylandy. Jalpy, mamandardyń barlyǵy da osyndaı basqosýlar arqyly esirtkige qarsy kúreste kúsh biriktirgendi qup kóredi.
Nurlybek DOSYBAI,
«Egemen Qazaqstan»