Chempıondar lıgasynyiń toptyq kezeńinde dormýndtyq "Borýssııa" varshavalyq "Legııadan" 8:4 esebimen basym tústi, dep habarlaıdy Vesti.kz.
Jeńimpaz komanda quramyndaǵy Marko Roıs het-trık, Sındzı Kagava dýbl jasasa, Nýrı Shahın men Ýsman Dembele, Felıks Passlak bir goldan salǵan. "Legııa" quramynda oınaıtyn Aleksandar Prııovıch pen Mıhal Kýharchık, Nemanıa Nıkolıch qarsy komandanyń qaqpasyna dop salǵan.
Sol arqyly bul komandalar jalpy nátıje boıynsha Chempıondar lıgasynda jańa rekord ornatty. Odan burynǵy jetistik 2003 jyly 8:3 esebimen aıaqtalǵan "Monako" - "Deportıvo" oıynynda tirkelgen.
Sonymen qatar týrnır tarıhynda alǵash ret birinshi taımda 7 gol salynǵan. "Borýssııa" 5 dopty alǵashqy 15 mınýttyń ishinde salǵandyqtan, bul da rekord sanalady deıdi Opta.
Eurosport "Borýssııa" men "Legııa" osy matchta ornatqan basqa da rekordtarǵa sholý jasap kórdi:
- Tarıhta birinshi ret goldardy 8 oıynshy saldy;
- "Legııa" - 4 gol salyp jeńilgen alǵashqy komanda;
- Komandalar týrnır tarıhynda alǵash ret alǵashqy 25 mınýtta 5 dop saldy;
- "Monako" men "Deportıvo" 47 mınýtta 7 gol salsa, "Borýssııa" men "Legııaǵa" 32 mınýt jetkilikti boldy;
- "Legııa" qaqpasyna 17 jáne 20-mınýttar aralyǵynda 3 gol salǵan "Borýssııa" "Lıonnyń" (2011/2012) rekordyn qaıtalady. Eki komanǵa da 3 mınýt 17 sekýnd jetkilikti boldy;
- "Legııa" Chempıondar lıgasynda bir komandadan 14 gol jiberip alyp, antırekord ornatty.