2010 jyly "Bolashaq" baǵdarlamasymen Brıtanııada magıstratýra boıynsha bilim alyp qaıtqan Ásel Ádildiń mamandyǵy qarjyger. Bul týraly Forbes Qazaqstan basylymy jazady.
"Men shet elde oqyp júrip Qazaqstanǵa degen saǵynyshymdy bildiretin ulttyq naqyshtaǵy aksessýar izdedim. Degenmen, ol kezde tek qoldan jasalǵan (hand made) buıymdar ǵana satylatyn. Al olardyń sapasy aıtarlyqtaı jaqsy emes. Sol kezde maǵan ulttyq naqyshtaǵy oıýlarmen órnektelgen, qoldan emes, fabrıkada sapaly daıyndalǵan buıymdar jasaý týraly oı keldi", - deıdi sheber.
Jańa startapqa ápkesi Áseldiń ápkesi Indıra da qoldaý bildirip, 15 myń dollar qarjy beredi. Osylaısha Adili brendimen ulttyq naqyshtaǵy buıymdar ómirge keledi.
"Bastapqyda satý jaǵy qıyndaý boldy. Fabrıkada óndiris júrý úshin tapsyrys ta tıisinshe kóp bolýy kerek. Meniń Qytaıda tanystarym bar edi, solar tapsyrystarymdy oryndaıtyn tigin sheberhanasyn taýyp berdi. Qazir biz Túrkııaǵa da tapsyrys berip jatyrmyz", - deıdi Ásel.
Apaly-sińili Indıra men Ásel basynda Qazaqstanda tigýdi josparlaǵan eken. Degenmen, elde mundaı tapsyrystardy oryndaı alatyn sheberhana bolmaǵan.
Qazir kásipkerdiń negizgi áriptesteri Qytaıda, aldaǵy ýaqytta Ásel Italııanyń kompanııalarymen de jumys isteýdi josparlap otyr.
Brendtiń paıda bolǵanynan bergi tórt jyl boıy Ásel jalǵyz jumys istep keledi.
"Meniń bul salada eshqandaı da bilimim joq. Tek bala kezde shyǵarmashylyqqa qumar edim", - deıdi Ásel.