Ulttyq ulannyń arnaıy maqsattaǵy bólimsheleri arnaıy operasııalardy oryndaý kezinde atý múmkindikterin arttyrý maqsatynda qarý-jaraqtyń jańa túrleri, zamanaýı optıkalyq jáne elektrondy-optıkalyq qurylǵylar alyndy. Áskerı qalashyqtardyń lańkestikke qarsy qaýipsizdigi úshin 2017 jyly «PZTM» aksıonerlik qoǵamynan (Petropavl q.) «Ulan» kúzeti tehnıkalyq quraldar júıesiniń mamandandyrylǵan keshenin satyp alý josparlanyp otyr. Bul týraly búgin Ortalyq kommýnıkasııalar qyzmetinde ótken brıfıngte Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov habarlady.
-2009 jyldan bastap arnaıy kólikter – brondy tehnıkanyń «Tıgr», «Federal» jáne «Ýral VV» syndy jańa túrleri kele bastady. 2011 jyldan beri «SEMAZ» AQ kólik zaýytynyń «ÝRAL» belgisindegi avtokólikteri ákeline bastady, - dep atap ótti Bas qolbasshynyń orynbasary.
Kadrlardy daıarlaý men áskerı qyzmetshilerdiń kásibıligin arttyrý ásker damýynyń negizgi basymdyqtarynyń biri bolyp sanalady. Osy oraıda, Memleket basshysynyń Jarlyǵymen 1997 jyly Ulttyq ulannyń Petropavlda áskerı ýchılıshesi qurylyp, keıin oqý ornyna Áskerı ınstıtýt mártebesi berildi.
Áskerı ınstıtýt qurylǵan kúnnen bastap 2900 ofıserlik kadr daıarlady, olar búginde Ulttyq ulan, UQK Shekara qyzmeti, QM jáne MKQ áskerı bólimderinde qyzmet atqarady.
Operatıvtik-taktıkalyq deńgeıdegi joǵary bilikti kadrlar daıarlaý maqsatynda 2010 jyldyń qarasha aıynda Tuńǵysh Prezıdent – Ult kóshbasshysy atyndaǵy Ulttyq qorǵanys ýnıversıteti janynan Ultyq ulan fakýlteti quryldy. Sol ýaqyttan bastap áskerge 50-den asa áskerı is jáne qaýipsizdik magıstri daıarlandy, 120-dan astam ofıser biliktilik joǵarylatý kýrsynan ótti. О́tken 2016 jyldyń jeltoqsan aıynda atalǵan fakýltette qamtamasyzdandyrý kafedrasy ashylyp, onda tyl, tehnıka jáne qarý-jaraq, tárbıe salasynyń joǵary bilikti mamandary daıarlana bastady.
Táýelsizdik jyldary ishinde Prezıdent Jarlyǵymen qaısarlyq pen erlik tanytqany úshin ár túrli memlekettik nagradalarmen – 145 áskerı qyzmetshi, olardyń 40-y ordendermen nagradtaldy. Sondaı-aq polkovnık Qaırat Úmbetovke eń joǵary dárejeli erekshelik belgisi – «Halyq qaharmany» ataǵy berildi.
Jalpy alǵanda, atqarylǵan tıimdi jetildirý sharalary áskerdiń jańa sapaly kezeńge shyǵýyna, nátıjesinde memlekettiń ishki qaýipsizdigine qaýip-qater tóndiretin jaıttarǵa qarsy jedel áreket etýge, elimizdiń kez kelgen aýmaǵynda qalypty, ne bolmasa kúrt ýshyqqan jaǵdaı kezinde de quqyq qorǵaý jáne terrorızmge qarsy mindetterdi sátti sheshýge mol múmkindikter berip otyr.
Dastan Kenjalın, "Egemen Qazaqstan".