Qudanyń qudireti, Qaraǵandy oblysyndaǵy Osakarov aýdanynyń aýmaǵynda qys bolsa boran soǵady da turady. Jeriniń ornalasý ereksheligine baılanysty ma eken, áıteýir basqa óńirde jaıaý burqasyn ǵana syrǵysa, bul jerde at qulaǵy kórinbeıtin aqtútek borannan kóz ashpaısyń...
Jańa jyldyń alǵashqy aptasynda da boran bir tynbaı soqty da turdy. Sonyń saldarynan Osakarovka kentiniń ústinen barlyq baǵyttaǵy eldi mekenderge ótetin joldar túgel jabylyp qaldy. О́ıtkeni, boran óz aldyna, keı jerlerdegi qardyń qalyńdyǵy 1,5 metrge deıin jetken edi.
Sondaı kúnderdiń birinde aýdan ortalyǵynan 40 shaqyrymdaı jerdegi Qaraǵaıly aýylynan aıy-kúni jaqyndaǵan áıeldi aýyr tolǵaq qysyp jatqandyǵy týraly habar kelip jetti. Aýdandyq aýrýhanadaǵylar tótenshe jaǵdaılar bólimshesimen jedel baılanysyp, kómek suraýǵa májbúr bolǵan.
Dárigerlerdi dittegen jerine jetkizý úshin qutqarýshylar omby qardy eleń qyla bermeıtin, barlyq kerek-jaraqpen jabdyqtalǵan ZIL-131 kóligin jolǵa shyǵardy. Sonyń arqasynda, dalanyń siresken qaryn buzyp-jaryp, bosana almaı qınalyp jatqan anaǵa der ýaqytynda jetýdiń múmkindigi týdy.
Sóıtip, dárigerler men qutqarýshylardyń tize qosa qımyldaǵan eńbegi dalaǵa ketpeı, dúnıege balpanaqtaı ul din-aman keldi.
Qaırat ÁBILDINOV,
«Egemen Qazaqstan»
Qaraǵandy oblysy,
Osakarov aýdany