nemese sýrettegi altaý týraly sóz
Eki márte Sosıalıstik Eńbek Eri Jazylbek Qýanyshbaevtyń, «Malshylardyń marshaly» atanǵan Jaz-atamyzdyń aınalasynda árdaıym jarqyn júzdi, jaıdary minezdi adamdar az bolmaıtyn.
О́tken ǵasyrdyń jetpisinshi jyldarynyń bas kezinde túsirilgen myna sýrettegi Jazekeńdi ortaǵa alyp otyrǵan azamattar týraly aıtsam deımin.
Jazekeńmen ıyqtasa sol jaqta otyrǵan Moıynqum aýdanyn shırek ǵasyrdan asa basqarǵan, osy óńirdiń órkendep ósýine ólsheýsiz órnek salǵan, keremet eńbegimen el qurmetin ıelengen, maıdanger Aıtbaı Nazarbekov.
Al endi sol jaq shettegi Sovet Ǵalıaqparov kezinde jańa aýdannyń qaz turyp, qadam basýyna úlesin qosqan, aýdandyq keńes atqarý komıtetiniń tóraǵasy bolǵan.
Oń jaqtaǵy Ermek Saýranbaev. Aýdandyq partııa komıtetiniń ekinshi hatshysy qyzmetinde Ermek aǵamyz da shalǵaıda jatqan Moıynqumnyń moıyn bosatpaıtyn shalymdy sharýasynyń ilgerileýi úshin irkilmeı jumys istegen. Keıinnen Qazaqstan Kompartııasy Ortalyq komıtetinde jaýapty qyzmet atqardy, Merke aýpartkomynyń birinshi hatshysy boldy.
Joǵaryda turǵandardyń sol jaqtaǵysy Qarataı Adambaev. Bul kisi de jańa aýdannyń shańyraǵyn kóterisip, ýyǵyn shanshysqan. «Moıynqum» sovhozynda dırektor bolǵan, aýdannyń aýyl sharýashylyǵy basqarmasyn baıypty basqarǵan. Aıtqandaı, Qarakeń qazaqtyń belgili ádebıet zertteýshisi Baltabaı Adambaevtyń týǵan inisi.
Oń jaqta turǵan sýrettegilerdiń eń jasy, alystaǵy aýdannyń abyroıyn arttyrǵan ardaqty azamattyń biri – Shotaı Taıbaǵarov. Ol sonaý Keńes ókimeti kezinde qoıdy jedel qyrqýdan aldyna jan salmaǵan edi. Eki dúrkin KSRO-nyń chempıony atandy, sol tustaǵy Ekonomıkalyq О́zara Kómek Keńesine (SEV) múshe elderdiń absolıýtti chempıony.
...Búginde bul kisiler túgeldeı baqılyq bolǵan. Iá, bári de ketedi, bári de ótedi... Biraq, dana da dara halqymyz anyq aıtqandaı, «Jaqsynyń aty ólmeıdi, ǵalymnyń haty ólmeıdi». Myna sýrette beınelengen asyl azamattardyń da artynda eliniń erekshe esinde, halqynyń jadynda jattalyp qalatyndaı jaqsy izi, jarqyn isi bar!
Berikbaı QADYQOV,
jýrnalıst
ALMATY