Haırýlla-Sultan Hısamı – AQSh-tyń Nıý-Iork kıno akademııasynyń 3-kýrsynda bilim alyp júrgen mańǵystaýlyq jas. Talantyn ispen dáleldeýge umtylǵan ol Gollıvýdta túsirilgen «Aqyrǵy kúná» atty qysqa metrajdy fılminiń tusaýyn týǵan jerine kelip kesti.
Bıýdjeti 3 myń dollardy quraıtyn kıno batystyq stılde túsirilgen, al maǵynasy jaǵynan qatygezdikten aýlaq bolýǵa jáne jasalǵan kúnáni keshirýge úndeıdi. Fılm sıýjeti keıipkerler – qydyrýmen kúná jasaǵan dindar men onyń uly arasynda órbıdi. Kúná aralasqan qıyndyqtan keshirim, meıirim jáne tózimdilikpen kúresý arqyly shyǵý joly usynylady.
Kalıfornııanyń dalasynda túsirilgen kıno úshin nebári bir-aq kún jumsalǵan. «Eń basty qıyndyq – kúnniń qatty ystyq bolýy edi», deıdi Haırýlla-Sultan Hısamı.
Ázirge jabyq kórsetilimmen jurtshylyq nazaryna usynylǵan fılmdi 200-ge tarta aqtaýlyq tamashalap, oń pikirlerin bildirdi. Jas talanttyń shetelde alǵan bilimin damytyp, tyrnaqaldy týyndysyn jaryqqa shyǵaryp úlgergenine qýanyp, muny óńir ónerine jańa da jas talanttyń qosylýy dep baǵalap jatty.
Kıno sońynan Nazarbaev zııatkerlik mektebiniń 11-synyp oqýshysy Damır Beshakovpen birge sheberlik synybyn ótkizgen Haırýlla-Sultan óz armany týraly bólisip, armanǵa jetý jolyndaǵy tabandylyq týraly áńgimeledi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
Sýretter tumba.kz saıtynan alyndy