Almatyda Ýnıversıada-2017 oıyndaryna qatysatyn sportshylardyń bir kúndik kalorııa normasy talaptary anyqtaldy.
Dıreksııa málimetine qaraǵanda, 4000-4500 kalorııa aralyǵynda bolady. Endi atletter úshin as mázirin daıyndaǵan kezde osy norma eskeriledi.
Sportshylarǵa arnalǵan táýliktik tamaqtaný normasynda et, sút ónimderi, astyq buıymdary sekildi mańyzdy ónimder qarastyrylǵan. Sondaı-aq, atletterdiń durys zat almasýyn saqtaý úshin olarǵa paıdaly sýsyndardyń barlyq túrleri usynylady.
Osylaısha qysqy oıyndar 110 000 kılogramǵa deıingi mólsherde et ónimimen, sonyń ishinde qoı, jylqy, taýyq jáne kúrketaýyq etimen qamtamasyz etiledi. Ýnıversıada-2017 sportshylary men qatysýshylaryna arnalǵan taǵam úlestirý beketterine shamamen 6100 kg-den un ónimi men 60 000 kg-dan astam sút ónimi jetkiziledi.
Ýnıversıada kezinde sportshylar men resmı delegasııalar músheleri, FISU tehnıkalyq delegattary, halyqaralyq tehnıkalyq mamandar (ITOs), ulttyq tehnıkalyq mamandar (NTOs), eriktiler, BAQ ókilderi, medısınalyq qyzmetkerler, Uıymdastyrý komıteti, FISU Family ókilderi tamaqtandyrylatyn bolady. Sondaı-aq, Atletter aýylynda qazaqtyń ulttyq, eýropalyq jerortateńizilik, azııalyq, vegeterıandyq jáne halal sekildi bes taǵam túrlerin daıyndaıtyn 1000 orynǵa shaqtalǵan ashanalar jumys jasaıdy.
Ýnıversıada eriktileri úshin tamaqtandyrý lanch-bokstar túrinde usynylady. Sondaı-aq, árbir nysannyń kommersııalyq aımaǵynda kórermender men jankúıerlerge arnap tamaqtandyrý uıymdastyrylady.
Sondaı-aq, Almaty qalasynyń Tutynýshylardy qorǵaý departamentimen birlese otyryp, Ýnıversıada-2017 oıyndary kezinde Tamaqtandyrýǵa baqylaý júrgizý jónindegi birlesken is-sharalar kesheni daıyndaldy. Osylaısha sportshylar men qonaqtardyń sanıtarlyq-epıdemıologııalyq saýlyǵy qamtamasyz etiledi. Nysandarda gıgıenalyq normatıvterdiń qanshalyqty saqtalyp otyrǵandyǵyn tekserý baǵytynda zerthanalyq zertteýler men aspaptyq ólshemder júrgiziledi.
Aınash ESALI,
«Egemen Qazaqstan»
ALMATY