Pavlodar qalasyndaǵy Ortalyq stadıon aýksıonǵa shyǵarylatyn boldy. Satyp alý quqyǵynsyz senimgerlik basqarýǵa berý boıynsha bolatyn saýda básekesi 18 qańtar kúni ótedi.
Ertis jaǵasyndaǵy qalanyń basty sport arenasy saýdaǵa salýshylar úshin kepildik jarna 17 921 070 teńgeni quraıdy. Osyndaı mazmundaǵy habarlandyrý Qarjy mınıstrliginiń memlekettik múlik jáne jekeshelendirý komıtetiniń memlekettik múlik tizilimi saıtynda paıda boldy.
Atalmysh jarnamada tenderlik sharttar tolyq kórsetilgen. Onda beıinge sáıkes qyzmetti júzege asyrý, múgedekterge tegin qyzmet kórsetý, shtat sanyn saqtaý jáne sporttyq keshenniń shyǵynsyz damýyn qamtamasyz etý sekildi tarmaqtar bar.
Eske sala keteıik, bul kezge deıin Qazaqstannyń birneshe dúrkin chempıony bolyp úlgergen «Ertis» fýtbol klýbynyń alańy ispettes bul Ortalyq stadıon 1947 jyly qatarǵa qosylǵan. Ol sońǵy jyldary komandanyń eýrokýboktarǵa qatysýyna oraı birneshe ret kúrdeli jóndeýden ótkizilgen.
Buǵan qosa, qalada «Juldyz» stadıony, «Shymyr» jáne «Tolqyn» dene tárbıesi-saýyqtyrý keshenderiniń de satylymǵa qoıylǵanyn aıta ketkenimiz lázim.
Dastan KENJALIN,
«Egemen Qazaqstan»