Atyraý oblysynda jastarǵa arnalyp barlyǵy 220 páter bolatyn úıler salynyp jatyr. Olardyń 120 páteri bıylǵy naýryzda aıaqtalady dep josparlanǵan, al qalǵan 100 páterli úıdiń qurylysy endi bastaldy. Úıler jas otbasylarǵa arnalǵan "Jas Otaý" baǵdarlamasy boıynsha turǵyzylyp jatyr. Bul týraly Atyraý oblysynyń ákimi Nurlan Noǵaev ákimdikte ótken kezekti jınalysta aıtty, dep habarlady Atyraý oblysy ákimdiginiń baspasóz qyzmeti.
Degenmen, aımaq basshysy bul páterlerdiń azdyq etetinin, jastarǵa degen qoldaýdy barynsha údetý qajet ekenin jetkizdi.
"Úı alyp, úı bolýǵa muqtaj adamdar kóp. Olardyń bárine qoldaý kórsetip jatyrmyz. Solardyń ishinde jastarǵa da arnaıy kóńil bólýimiz kerek. Sebebi, jastar - qoǵamnyń lokomotıvi. Bıyl 120 otbasy úıli bolady. Bul eń aldymen olardyń bolashaq urpaǵyna degen qamqorlyq", - dedi Noǵaev.
Onyń aıtýynsha, qazir bul jobany iske asyrýǵa Shyǵys Qazaqstan oblysy men Almaty qalasy nıet bildirip otyr eken. Oblys ákimi jastardy bireýden kómek kútpeı, aıanbaı eńbek ete bilýge shaqyrdy.
"Sizderde bizdiń oıymyzǵa kele bermeıtin ıdeıalar óte kóp. Oılaryń tyń. Qazirgi tehnologııalardyń kópshiligin sizder sekildi jastar oılap shyǵarǵan. Boılaryndaǵy potensıaldy paıdalanyp, ózderiń jaryp shyǵýlaryń kerek", - dedi aımaq basshysy.
Aıta ketelik,byltyr Atyraýda "Dıplommen aýylǵa" boıynsha 41 jas maman bıýdjettik nesıe alyp, 113-i kóterme járdemaqy alǵan. Sonymen qatar, 298 adam turaqty jumysqa ornalasty. 27 jas kásipkerdiń alǵan nesıeleri sýbsıdııalanyp, 23 kásipkerdiń nesıesi kepildendirildi. Bıyl Atyraý qalasynda "Jastar Saraıynyń" qurylysy josparlanyp otyr.