Aksııaǵa elimizdiń 140 myńnan astam azamaty qatysqan. Barlyǵy 5,7 trln teńge zańdastyryldy, onyń ishinde 4,1 trln teńgesi – aqshalaı, 1,6 trln teńgesi - múlik túrinde. 151 myńǵa jýyq jyljymaıtyn múlik, sonymen qatar zańdy tulǵalarǵa qatysýdaǵy 213 úles zańdastyryldy. Bul týraly Úkimettiń kezekti otyrysynda qarjy mınıstri Baqyt Sultanov Qazaqstanda júrgizilgen zańdastyrýdyń aralyq nátıjeleri týraly esep berý barysynda málimdedi.
Spıkerdiń aıtýynsha, aksııanyń sońǵy aılarynda halyqtyń joǵary belsendiligi baıqaldy – 2016 jyldyń tórtinshi toqsanynda qarajattyń 53% zańdastyryldy.
El ishinde 5 trln teńgege, shetelderde 0,7 trln teńgege aktıvter zańdastyryldy, onyń ishinde 614 mlrd teńgesi – aqshalaı, 70 mlrd teńgesi – múlik túrinde. Aqshany zańdastyrý úshin jalpy 11 821 esep ashyldy. Zańdastyrylǵan 151 myń jyljymaıtyn múlik nysanynan 9,5 myń nysan kommersııalyq jyljymaıtyn múlik retinde esepke alynǵan. 5,7 trln teńgeni zańdastyrý negizgi ekonomıkalyq kórsetkishterge qoldaý jasady.
Qarjy mınıstri atap ótkendeı, 1,9 mlrd teńge bank esepshottarynda qalyp otyr. Bul bank qorlarynyń jáne ekonomıkany nesıelendirýdiń qosymsha kózi bolyp tabylady. Azamattar 2,2 mlrd teńge kólemindegi zańdastyrylǵan aqshalaryn banktegi esepshottarynan sheship alǵan. Bul qarajat ınvestısııalar, tutyný nemese jınaqtaýǵa jumsalǵan. Atalǵan jyljymaıtyn múliktiń 1,6 mlrd teńgesi – nesıe alý úshin áleýetti kepil múlik.
Jalpy, zańdastyrý kólemi boıynsha kósh basynda Almaty (3 trln 981 mlrd teńge) men Astana (533 mlrd teńge) tur.
Eske sala keteıik, múlikti zańdastyrý máseleleri týraly zań 2014 jyldyń qyrkúıek aıynan bastap kúshine endi. Keıinirek, júrgizilip jatqan aksııanyń dınamıkasyn jaqsartý maqsatynda, Memleket basshysy múlikti zańdastyrý sharttaryn qaıta qarastyryp, zańdastyrý sýbektilerine qosymsha kepildikter usyný týraly tapsyrma bergen bolatyn. Qazaqstan Respýblıkasynyń oǵan sáıkes keletin Zańyna 2015 jyldyń 13 qarashasynda qol qoıylyp, 2015 jyldyń jeltoqsan aıynan bastap kúshine engen.