Qazaqstanda halyqtyń tórtten biri - jastar. Olar eldiń odan ári damýyna baǵyttala alatyn zor áleýet. Bul týraly búgin QR Premer-Mınıstri Baqytjan Saǵyntaev Úkimet otyrysy barysynda aıtty. Sonymen qatar Premer-mınıstr mınıstrlikterge jastar saıasatyn sapaly júzege asyrýdy qamtamasyz etý jáne jastardy memlekettik qoldaý sharalary týraly tıimdi aqparattandyrý boıynsha tapsyrma berdi.
B. Saǵyntaev jastar saıasaty degenimiz memleket pen jastar arasyndaǵy qarym-qatynas qana emes ekenin atap ótti. Bul baǵyttaǵy jumystardyń tıimdi bolýy úshin oǵan qoǵam da, bıznes te qyzyǵýshylyq tanytýy tıis. Ásirese, el aımaqtaryndaǵy jastar saıasatynyń saýatty júzege asyrylýy asa mańyzdy.
Primeminister.kz habarlaǵandaı, otyrys barysynda jastar ókilderi tyńdaldy. Olardyń ishinde «Bolashaq» respýblıkalyq qozǵalysynyń tóraǵasy men «Jastar úni» jastar birlestiginiń tóraǵasy Dáýren Babamuratov, Ulttyq volonterlik jelisiniń tóraıymy Vera Kım jáne Qazaqstan stýdentter Alıansynyń basshysy Merjan Ábilqas boldy.
«Jastar saıasatynyń basymdyqtaryn Memleket basshysy jeltoqsan aıynda ótken jastar forýmynda belgilep bergen bolatyn. Osyǵan baılanysty Din isteri jáne azamattyq qoǵam mınıstrligine jastardyń belsendiligin yntalandyrý úshin jańa tetikter men tásilderdi paıdalana otyryp Memleket basshysynyń nusqaýlaryn júzege asyrýdy qamtamasyz etýdi tapsyramyn», - dedi B. Saǵyntaev.
Sonymen qatar, Premer-Mınıstr Aqparat jáne kommýnıkasııa mınıstrligine ásirese, jastar arasynda keńinen taralǵan ǵalamtor men áleýmettik jelilerde memlekettik baǵdarlamalardyń júzege asyrylýy boıynsha aqparattyq jumystardy kúsheıtýdi tapsyrdy.