Qazaqstannyń Eńbek Eri, aýylsharýashylyq salasynyń bilgir mamany, «Zenchenko jáne K» komandıttik seriktestiginiń bas dırektory Gennadıı Ivanovıch Zenchenkonyń elimizdiń qaryshtap damýyna qosqan úlesi ólsheýsiz. Dańǵaıyr dıqannyń alǵa qoıǵan arman-maqsattary kóp bolatyn. Onyń biri – jelkildep ósip kele jatqan jastar úshin biregeı sport keshenin turǵyzý edi. Seriktestik esebinen mol qarajat qarastyryp, qurylys jumystary bastala bergende, ajal aramyzdan beımezgil alyp ketti. «Ornynda bar ońalar» degen. Onyń oıyn sharýashylyq tizginin ustaǵan uly Gennadıı júzege asyrdy.
Novonıkolsk eldi mekeninde deneshynyqtyrý jáne saýyqtyrý kesheni boı kóterip, ashylý saltanatyna oblys ákimi Erik Sultanov qatysty. Zamanaýı qural-jabdyqtar ornatylǵan mundaı keshen qalalyq jerlerde de sırek kezdesedi desek, artyq aıtqandyq emes. Voleıbol men basketbolǵa arnalǵan alańdar, jattyǵý zaly, ádistemelik, medısınalyq kabınetter, sheshinetin, jýynatyn bólmeler, bılıard zaly, 4 jolaqshasy bar 25 metrlik basseın jumys isteıdi.
– Gennadıı Ivanovıch turǵyndardyń ómir sapasyn, densaýlyǵyn jaqsartý máselesin árkez basty nazarda ustaıtyn. Áleýmettik máselelerge qarjy aıamaıtyn. Osy ǵımaratty salýǵa 240 mıllıon teńge bólgizdi, – dedi óz sózinde Erik Hamzauly.
О́mir ESQALI,
«Egemen Qazaqstan»
Soltústik Qazaqstan oblysy,
Qyzyljar aýdany
Sýretterdi túsirgen
Vıtalıı VLASENKO