úzdik oqytýshy atandy
Almatydaǵy Qazaq memlekettik qyzdar pedagogıkalyq ýnıversıteti – TMD elderi arasynda tek arýlarǵa arnalǵan birden-bir joǵary oqý orny. Qara shańyraqta qazirgi tańda 8500-ge jýyq stýdent bilim alýda.
Qyzdar ýnıversıteti úshin jyl jaqsy bastaldy. Bilim oshaǵynyń jeti birdeı ustazy Bilim jáne ǵylym mınıstrliginiń «Joǵary oqý ornynyń úzdik oqytýshysy» atandy. Olar – qazaq fılologııasy jáne álem tilderi fakýltetiniń ustazy, professor Lázzat Ádilbekova, fızıka-matematıka fakýltetiniń professory Ájimuqan Jamalov, qazaq fılologııasy jáne álem tilderi fakýltetiniń qaýymdastyrylǵan professory Saǵıra Odanova, fızıka-matematıka fakýltetiniń professory Elmıra Bakırova, áleýmettik-gýmanıtarlyq fakýltetiniń qaýymdastyrylǵan professory Sara Qyryqbaeva, óner jáne mádenıet fakýltetiniń professory Móldir Orazalıeva, pedagogıka jáne psıhologııa fakýltetiniń professory Gúlnar Muratbaeva.
Ustazdar jetistigimen qatar, jyldan-jylǵa ýnıversıtettiń de tabystary eselenýde. 2015 jyly Qyzdar ýnıversıteti Ulttyq bıznes reıtıngtiń halyqaralyq reıtıng odaǵynyń sheshimimen «Sala kóshbasshysy-2015» sertıfıkatymen jáne «Sala kóshbasshysy-2015» qabyrǵa medalimen marapattalsa, ótken jyly QS Stars University Ratings halyqaralyq reıtıngi boıynsha «3 juldyz» ıelengen tuńǵysh pedagogıkalyq joǵary oqý orny atandy. Al bilim oshaǵynyń rektory Dınar Nóketaeva jańa jyl qarsańynda respýblıka rýhanııaty men biliktilik áleýetin kóterýdegi qyzmeti úshin «Parasat» ordenimen marapattaldy.
Qazirgi tańda Qazaq memlekettik qyzdar pedagogıkalyq ýnıversıteti – Ulttyq reıtıng boıynsha pedagogıkalyq JOO-lar ishinde alǵashqy oryndardy ıelengen eń úzdik ýnıversıtet bolyp tabylady. Eýropalyq bilim berý júıesine qaraı boı túzegen ýnıversıtette úsh deńgeıli mamandar daıyndaý júıesi tolyǵymen engizilgen. Búginde ýnıversıtet qos dıplomdy baǵdarlamalar boıynsha bilim alýǵa qol jetkizip, LAMS (Ulybrıtanııa) jáne Mıssısıpı (AQSh) atty álemdik ýnıversıtettermen arnaıy baǵdarlamany júzege asyrýda.
Aınash ESALI,
«Egemen Qazaqstan»
ALMATY