Fransııanyń kýrortty shahary Albıezden Altaıǵa jaǵymdy jańalyq jetti. On bes jastaǵy óskemendik boıjetken Aıaýlym Ámirenova frıstaıldyń mogýl túrinen ótken Eýropa kýbogynyń birinshi kezeńinde 3-shi, juptasyp óner kórsetýden saıysqa túsken ekinshi kezeńde 2-oryndy ıelendi. Qazir eki kezeń boıynsha sátti syrǵanaǵan qazaq qyzy reıtıngte kósh bastap, úzdikterge beriletin sary jeıdeni kıipti. Shańǵy jastanyp, konkı tósenip ósken Eýropanyń azýly sportshylarynyń arasynan sýyrylyp shyǵyp, úzdik úshtikke iliný úlken jetistik, árıne.
Shet elde júrgen Aıaýlymnyń ózimen tildesýge múmkindik bolmaǵannan keıin О́skemende turatyn ata-anasynyń úıine arnaıy baryp, quttyqtap, suhbattasyp qaıttyq.
– Bul – Aıaýlymnyń sporttaǵy alǵashqy úlken jetistigi. Qýanyshtan júregimiz jarylardaı bolyp tur. Árıne, el ishindegi jarystarda top jaryp júrgenimen, shetelde ótetin úlken dúbirli dodalarda júldege iliný ońaı sharýa emes. Buǵan deıin qyzymyz eki-úsh márte Eýropa kýbogyna qatysyp, birde 10, birde 8-oryndardy ıelenip júrdi. Eń joǵarǵy jetistigi – 6-oryn. Bul jolǵy jarystyń birinshi kezeńinde 1-oryndy Norvegııa, 2-oryndy Brıtanııa sportshylary alǵan eken. On alty memleketten qatysqan jıyrma tórt qyzdyń ishinen 3-orynnan kóriný úlken jetistik dep oılaımyn. Bolashaǵy áli alda ǵoı, – deıdi anasy Gaýharııa Sabıldına.
Kári qurlyqta ótken bul dúbirli dodaǵa О́skemennen Aıaýlymmen birge eki sportshy qatysqan kórinedi. 18 jastaǵy Oleg Sınn birinshi kezeńde 6-orynǵa taban tirepti.
Gaýharııa Sabıldınanyń aıtýynsha, Eýropa kýbogyna qatysqan sportshylardyń ishindegi eń jasy kishisi Aıaýlym eken.
Qazaq balasyna jalynan sıpatpaı júrgen qysqy sport túrlerinde sońǵy kezderi qandastarymyzdyń qatary kóbeıip kele jatqany qýantady. Aıaýlymnyń ákesi Serik Ámirenov qyzyn alǵash osy sport túrine jetelep aparǵanda 80 balanyń tórteýi ǵana qarakózderimiz bolǵan eken. О́skemende qazaq qyzdary arasynan frıstaıldyń mogýl túrimen alǵash bolyp shuǵyldanyp júrgen Aıaýlym Ámirenova qazir qaladaǵy daryndy balalarǵa arnalǵan sport mektebinde 10-synypta oqıdy. Bapkeri – esimi elimizge keńinen tanymal, talaı sańlaqtardy túletken Vıktor Reıhard.
– Qyzymyzdy osy sport túrine jibergenimizge esh ókinbeımiz. Aıaýlymnyń da eń úlken armany – aq Olımpıadaǵa qatysý. Bapkerleri buǵan deıin: «Aıaýlym áli jas qoı. Asyqtyrmaımyz», dep júretin. Osy joly shet elge júrer aldynda:«Qaıtsek te Eýropada bestikke ilinýimiz kerek. Al Azıadada mindetti túrde oryn alýyń qajet», dep jatty bapkerleri, – deıdi anasy.
Shańǵyny urshyqsha ıirip júrgen qazaqtyń qaısar qyzynyń ákesi Serik Ámirenov Aıaýlymdy bul sport túrine tórt jasynda bergenin aıtady. Elimizdiń birneshe dúrkin chempıony, jastar arasyndaǵy spartakıadanyń jeńimpazy atanǵan óskemendik boıjetken qazir aqpan aıynda Japonııanyń Sapporo qalasynda ótetin Azıada oıyndaryna qatysýǵa ázirlenip jatqan kórinedi. Bir aıta keterligi, bul saıysta frıstaıldyń mogýl túrinen qazaq qyzdary arasynan jalǵyz Aıaýlym ǵana el namysyn qorǵaıtyn bolady.
Azamat QASYM,
«Egemen Qazaqstan»
О́SKEMEN