Syrtqy ister mınıstri Ermek Kósherbaev Vashıngtonǵa sapary aıasynda AQSh Memlekettik hatshysynyń birinshi orynbasary Krıstofer Landaýmen kezdesti. Kelissózder barysynda taraptar ekijaqty kún tártibindegi ózekti máselelerdiń keń aýqymyn, onyń ishinde saıası jáne ekonomıkalyq ózara is-qımyldy, saýda men ınvestısııalardy damytý, energetıka jáne asa mańyzdy mıneraldar salasyndaǵy yntymaqtastyqty talqylady.
Sondaı-aq olar óńirlik jáne jahandyq qaýipsizdik máseleleri boıynsha pikir almasty. Taraptar Qazaqstan men AQSh arasyndaǵy Keńeıtilgen strategııalyq seriktestikti odan ári damytýǵa beıildiligin rastady. Beıbitshilik keńesin qurý jónindegi amerıkandyq bastamaǵa jáne osy formatqa Qazaqstannyń quryltaıshy el retinde qatysýyna erekshe nazar aýdaryldy. Buǵan qosa osy jyly jeltoqsanda Maıamı qalasynda ótetin G20 sammıtine Qazaqstannyń qatysýyna daıyndyq máseleleri sóz boldy.
Mınıstr eldiń energııa resýrstary men asa mańyzdy mıneraldardyń jahandyq jetkizý tizbekteriniń turaqtylyǵyn qamtamasyz etýdegi strategııalyq rólin atap ótip, bul saladaǵy yntymaqtastyqty AQSh-pen ózara is-qımyldyń negizgi baǵyttarynyń biri retinde kórsetti.
О́z kezeginde, AQSh dıplomaty Qazaqstandy Ortalyq Azııadaǵy jáne halyqaralyq arenadaǵy senimdi seriktes retinde atap ótip, aldaǵy baılanystar ekijaqty qatynastar men praktıkalyq yntymaqtastyqty damytýǵa qosymsha serpin beretinine senim bildirdi.
Kelissózder barysynda Prezıdent Qasym-Jomart Toqaevtyń Vashıngtonǵa sapary men «S5+1» sammıtiniń qorytyndysy boıynsha shamamen 17 mlrd AQSh dollaryn quraıtyn buryn qol jetkizilgen kelisimder men ınvestısııalyq jobalardy iske asyrý máselelerine erekshe kóńil bólindi.
Kezdesý qorytyndysynda taraptar qoldanystaǵy yntymaqtastyq formattary aıasynda, sondaı-aq jańa tetikter men bastamalardy iske qosý arqyly ekijaqty ózara is-qımyldy nyǵaıtýǵa ýaǵdalasty.
Buǵan qosa Syrtqy ister mınıstri AQSh Memlekettik hatshysy Marko Rýbıonyń shaqyrýymen alǵashqy mańyzdy mıneraldar jónindegi konferensııaǵa qatysty.
50-den astam eldiń ókilderi men qazaqstandyq taý-ken kompanııalarynyń basshylary qatysqan is-sharada AQSh vıse-prezıdenti Djeı Dı Vens sóz sóıledi.
Is-shara barysynda mańyzdy paıdaly qazbalardyń jahandyq jetkizý tizbekterin ártaraptandyrý jáne nyǵaıtý, sondaı-aq olardy óndirý, óńdeý jáne logıstıka salalaryndaǵy halyqaralyq yntymaqtastyqty damytý máseleleri boıynsha pikir almasý ótti.
Otyrystyń sheńberinde E.Kósherbaev qatysýshylardy mańyzdy mıneraldar salasyndaǵy Qazaqstannyń áleýeti jáne eldiń senimdi ári turaqty jahandyq jetkizý tizbekterin qalyptastyrýǵa praktıkalyq úles qosýǵa daıyndyǵy týraly aıtty. Ol Qazaqstannyń mıneraldyq-shıkizattyq resýrstarynyń aýqymdy qoryna, olardy óńdeý boıynsha damyǵan ónerkásiptik bazasyna, zamanaýı ınfraqurylymyna, turaqty saıası júıesine jáne boljamdy retteýshi ortaǵa ıe ekenin tilge tıek etti.
Qazaqstan Geologııalyq qyzmetiniń (USGS) tizbesine engizilgen 60 mańyzdy mıneraldyń 20-sy boıynsha daıyn ónim túrinde jetkizilimderdi qamtamasyz etýge qabiletti ekeni atalyp ótti. Bul ónimder álemdik ekonomıkanyń strategııalyq salalarynda joǵary suranysqa ıe.
Qazaqstan men AQSh arasynda mańyzdy mıneraldar salasyndaǵy yntymaqtastyq týraly memorandýmdy iske asyrýǵa erekshe nazar aýdaryldy. Atalǵan qujat Memleket basshysynyń 2025 jylǵy qarashada Vashıngtonǵa jasaǵan saparynyń qorytyndysy boıynsha qol qoıylǵan jáne Ortalyq Azııadaǵy osyndaı formattaǵy alǵashqy kelisim sanalady. Memorandým Qazaqstan aýmaǵynda óńdeý qýattaryn damytý, tehnologııalar transferti jáne qazaqstandyq ónimniń AQSh naryǵyna qoljetimdiligin keńeıtýdi kózdeıdi.
Konferensııaǵa G7 elderi men Pax Silica bastamasyna qatysýshy memleketterdiń syrtqy saıası vedomstvolary men salalyq qurylymdarynyń 30-dan astam basshysy, sondaı-aq jetekshi halyqaralyq kompanııalardyń ókilderi qatysty.