Jaqynda kanadalyq professor, tarıh ǵylymdarynyń doktory Frank Albonyń Astananyń 20 jyldyq mereıtoıyna jáne EKSPO-2017 halyqaralyq mamandandyrylǵan kórmesine arnalǵan «Astana: Ańyzdar, Arhıtektýra jáne Taǵdyrlar» atty kitaby jaryqqa shyqpaq. Osy kitapty jazý barysynda ǵalym bizdiń elde birneshe márte qonaq boldy, onyń tarıhy jáne táýelsiz Qazaqstanda júzege asyrylǵan áleýmettik-ekonomıkalyq reformalar týraly bildi.
Prezıdent Nursultan Nazarbaev Qazaqstan halqyna Úndeý jarııalap, bılik tarmaqtary arasynda (Prezıdent, Parlament jáne Úkimet) ókilettikterdi qaıta bólý jospary týraly habarlady. Onda Konstıtýsııa men keıbir zańdarǵa ózgerister engizý qarastyrylǵan. Biz Úndeýge oraı pikirin bilmek oımen ǵalymǵa bir-eki suraq qoıǵan edik.
– Siz bul bastamany qalaı baǵalaısyz?
– Tarıhqa kóz júgirtsek, demokratııaǵa qol jetkizý jolynda ár el ár túrli kezeńderden ótkenin kórýge bolady. Eýropaǵa, tipti, Kanadaǵa naǵyz demokratııalyq qoǵam qurý úshin aıtarlyqtaı uzaq jyldar, keı jaǵdaıda ǵasyrlar kerek boldy. Al bar-joǵy 25 jyl ishinde Prezıdent N.Nazarbaevtyń kóregen bastamalarynyń arqasynda Qazaqstanda demokratııany damytý baǵytynda úlken qadamdar jasalǵany tańǵalarlyq qubylys.
Konstıtýsııalyq reformalar jasaý týraly taıaýda kóterilgen bastama Prezıdenttiń alysty boljaǵan kóregendigi men keremet bastamashyldyǵyn ǵana emes, onyń kóp jyl buryn mundaı mańyzdy memlekettik sheshimderdiń ashyqtyqty talap etetini týraly ýádesin oryndaǵanyn kórsetedi.
– Bul úderis Qazaqstan qoǵamyna qalaı yqpal etedi dep oılaısyz?
– Bılik ókilettikterin basqa bılik tarmaqtarynyń, halyq ókilderiniń arasynda qaıta bólý árqashan oń yqpal etedi. Men bul ózgeristerdi taǵatsyzdana tosamyn, sebebi, Qazaqstannyń damýyn uzaq jyldan beri baqylap kelemin. Der ýaqytynda qabyldanǵan osy sheshim keremet nátıjelerge jol ashady dep bilemin.
Áńgimelesken
Arnur ASQAR,
«Egemen Qazaqstan»