Almatyda ótip jatqan qysqy Ýnıversıada oıyndarynda erler arasynda Qazaqstan quramasy Shvesııamen kezdesip, 5:0 esebimen aıaqtaldy.
«Halyq Arenada» ótken oıynda Qazaqstan quramasy aıqyn basymdyqqa ıe boldy. Á, degennen alǵa umtylǵan otandastarymyz 2-mınýtta esep ashyp úlgerdi. Kırıll Savıskıı baǵyttaǵan soqqy kózdegen jerinen dál tabyldy. Osydan keıin qos komanda birin-biri ańdysyp, osal jerlerin tabýǵa tyrysyp baqty. Kezdesýdiń 18-mınýtynda oıynshy basymdyǵyn júzege asyrǵan qazaqstandyqtar Iаroslav Evdokımovtiń kómegimen ekinshi shaıbany soqty.
Matchtyń kelesi kezeńinde jankúıerler bir ǵana goldyń kýási boldy. Urymtal tusty utymdy paıdalanǵan Konstantın Savenkov eseptegi basymdyqty arttyra tústi.
Sonymen qatar, sońǵy 20 mınýt ta jospar boıynsha órbidi. Aldymen, 50-mınýtta Anton Sagadeev múmkindigin múlt jibermese, kezdesýdiń aıaqtalýyna úsh mınýt qalǵanda Dmıtrıı Grens sońǵy núkteni qoıdy. Bul jerde Shvesııanyń bir oıynshysy kem bolǵanyn aıta ketken jón.
Ýnıversıada oıyndarynda Qazaqstan quramasy osyǵan deıin Qytaı komandasyn 22:0 esebimen oısyrata utqan bolatyn, al Shvesııa Chehııadan 0:5 esebimen jeńilgen. Sheshýshi kezeńde Qazaqstan men Chehııa, Shvesııa men Qytaı synǵa túsedi.