Ońtústik Qazaqstan oblysy ákimdiginde óńir basshysynyń tóraǵalyǵymen oblys aýmaǵynda kóktemgi sý tasqynyn aldyn alý jumystary boıynsha OQO tótenshe jaǵdaılar departamenti qyzmeti men aýdan, qala ákimderiniń qatysýymen selektorlyq májilis ótti. Bul týraly ákimniń baspasóz qyzmeti habarlady.
«Jıynda oblys aýmaǵynda kóktemgi sý tasqyny, sel, syrǵyma, qar kóshkinin aldyn alý jumystary jáne óńirdegi sý qoımalarynyń jaǵdaıy talqylandy. Jıynda kóktemgi sý tasqynynyń aldyn alý sharalary boıynsha jaýapty tulǵalardyń baıandamasy tyńdaldy», delingen habarlamada.
Aıta keteıik, tótenshe jaǵdaıdyń aldyn alý maqsatynda, 2016 jyly oblystyń aýmaǵy men halqyn sý tasqynynan qorǵaý úshin 664,2 mln teńgege jalpy uzyndyǵy 6,21 shaqyrym arna túzeý jáne jaǵa bekitý jumystary júrgizildi. Al 1,5 mlrd teńgege jalpy uzyndyǵy 955 shaqyrym ırrıgasııalyq júıeniń sý ótkizý qabilettigi kúsheıtilip, joq jerlerge salyndy. Sondaı-aq, osy jyly sý tasqynnyń aldyn alý maqsatyna 856 mln teńge bólindi. Kóktemgi sý tasqynyna qaýipti kezeńge oblysty daıyndaý maqsatynda, oblys kóleminde 6,36 shaqyrym qorǵanys bógeti salynsa, 325,3 shaqyrym qorǵanys bógetteri nyǵaıtyldy. Al 36,3 shaqyrym bóget jańadan turǵyzyldy. Jáne de 48,5 shaqyrym ózenderdiń jaǵalaýlary bekitilip, 668,1 shaqyrym aryq-kanaldarmen 397 birlik sý ótkizý qubyrlary tazalandy.
Tótenshe jaǵdaılar departamentiniń habarlaýynsha, «Qazgıdromet», «Qazsýshar» RMK, «Qazseldenqorǵaý» MM OQF gıdrobeketterinen sý qoımalar men ózenderdegi sý deńgeıiniń tolýy jáne aǵyndary boıynsha kúndelikti shuǵyl aqparattar alynady. Olardyń málimdeýinshe, qazirgi tanda oblys aýmaǵyndaǵy sý tasý jaǵdaıy bir qalypty, ózenderdegi sýdyń deńgeıi aýmaly kúıdegi deńgeıden tómen, sý qoımalarynda sýdyń deńgeıi orta eseppen jobalyq mólsheriniń 30-35% quraıdy.