Burnaǵy kúni Qurlyqtyq hokkeı lıgasynyń kezekti týry aıasynda Astananyń «Barysy» óz muz aıdynynda Novosibirdiń «Sıbır» komandasymen kúsh synasyp, shıelenisti ótken oıynda 2:1 esebimen jeńiske jetti.
Astanalyq ujym úshin bul turaqty chempıonattaǵy 31-shi jeńis edi. Sonyń arqasynda jerlesterimiz osymen segizinshi ret týrnırdiń pleı-off kezeńine shyǵyp otyr.
Oıynnyń negizgi ýaqytynda soǵylǵan qos shaıba birinshi kezeńge tıesili boldy. Matchtyń 8-mınýtynda qonaqtardyń shabýylshysy Kırıll Vorobev esep ashsa, «Barys» tarapynan qarymta goldy 14-mınýtta Dastın Boıd soqty.
Alma-kezek shabýylmen ótken kezdesýdiń aıaǵyna deıin osy esep ózgermeı, komandalar qosymsha ýaqyt oınaýǵa májbúr boldy. Al overtaımnyń sońǵy sekýndtarynda Naıdjel Doýstyń qulashtaı soqqan shaıbasy «Barysqa» aýadaı qajet úsh upaıdy ákeldi.
Týrnırdiń kelesi kezeńindegi, ıaǵnı pleı-off synyndaǵy «Barystyń» qarsylasy belgili. Ol – Chelıabiniń «Traktor» komandasy.
Qazir jerlesterimizdiń enshisinde 89 upaı bar. Komanda «Shyǵys» dıvızıony boıynsha týrnır kestesinde besinshi orynda tur. Endi olar qalǵan eki oıyndy da óz aıdynynda ótkizedi. Astana hokkeı klýbyna qarsy «Metallýrg» (Novokýznesk) pen «Avangard» (Omby) komandalary oınaıtyn bolady.
Eske salar bolsaq, Astananyń «Barysy» 2008-2009 jyldardaǵy maýsymnan bastap turaqty chempıonattyń pleı-off kezeńine úzdiksiz shyǵyp keledi. Tek 2015 jyldyń 16 maýsymynda ǵana olar úzdik segizdiktiń qataryna qosyla almaǵan edi.
Qaırat ÁBILDINOV, «Egemen Qazaqstan»
ASTANA