Aqtaý qalasyndaǵy «Muryn jyraý Seńgirbekuly atyndaǵy Mańǵystaý joǵary pedagogıkalyq kolledjinde» ınnovasııalyq logopedııa jáne sıfrlyq bilim kabınetteriniń saltanatty ashylý rásimi ótti, dep habarlaıdy Egemen.kz Qoǵamdyq kommýnıkasııa ortalyǵyna silteme jasap.
Ashylý saltanatyna Mańǵystaý oblysy ákiminiń orynbasary Abbat О́risbaev, oblystyq máslıhat depýtattary, Analar keńesiniń músheleri jáne bilim berý uıymdarynyń qyzmetkerleri qatysty. Is-sharanyń maqsaty – bilim alýshylarǵa ınnovasııalyq logopedııalyq qoldaý kórsetý jáne sıfrlyq resýrstardy tıimdi paıdalaný arqyly qoljetimdi, sapaly bilim berý ortasyn qalyptastyrý.
Baǵdarlama aıasynda kolledjdiń jańartylǵan kelbeti men strategııalyq damý baǵyty tanystyrylyp, ınnovasııalyq logopedııa jáne sıfrlyq bilim kabınetteri ashyldy. Sonymen qatar tájirıbelik alańdarda «aqyldy aına», qum terapııasy, 3D-prınter jáne Pibody ınteraktıvti qurylǵysynyń qoldanylýy boıynsha workshop uıymdastyryldy.
«Muryn jyraý Seńgirbekuly atyndaǵy Mańǵystaý joǵary pedagogıkalyq kolledjiniń» dırektory Baqtygúl О́mirbekova jańa kabınetterdiń bilim berý úderisindegi mańyzyna toqtaldy.
«Búgin bizdiń kolledjde erekshe bilimdi qajet etetin balalarǵa arnalǵan logopedııalyq jáne sıfrlyq bilim kabınetteri ashyldy. Bul kabınetter sońǵy úlgidegi «aqyldy aına» jáne zamanaýı terapııalyq qural-jabdyqtarmen qamtamasyz etilgen. Negizgi maqsat – logopedııa mamandyǵy boıynsha bilim alyp jatqan stýdentterdiń praktıkalyq daǵdylaryn damytý. Stýdentter erekshe bilimdi qajet etetin balalarmen tikeleı jumys jasap, óz tájirıbelerin jetildiredi. Áleýmettik joba aıasynda til damýynda kemshiligi bar balalar tegin qabyldanady. Stýdentter olarmen praktıkalyq sabaqtar ótkizip, balalardyń sóıleý qabiletin damytýǵa jáne qoǵamǵa beıimdelýine óz úlesterin qosady. Sonymen qatar, kolledjde robototehnıka quraldarymen jabdyqtalǵan kabınetter jumys isteıdi. Biz ınformatıka páni muǵalimderin daıarlaımyz. Bolashaq pedagogter mektepterde zamanaýı ınnovasııalyq quraldarmen jumys isteıdi. Memleket basshysy jarııalaǵan «Sıfrlyq tehnologııalar jáne jasandy ıntellekt» jyly aıasynda bilim berý salasyna sıfrlyq tehnologııalar keńinen engizilýde. Bul kabınetterde stýdentter elektronıkaǵa qatysty jobalar jasap, olardy is júzinde júzege asyrady. Kolledjde sońǵy úlgidegi 3D-prınter de bar. Stýdentter osy quraldarmen jumys isteýdi meńgerip, daıyn maman retinde mektepterge barady. Bolashaqta olar oqýshylardy robototehnıka, elektronıka jáne ınformatıka baǵytynda sapaly bilimmen qamtamasyz etedi», dedi Baqtygúl О́mirbekova.
Aıta keteıik, atalǵan kabınetterde Túrkııa elinde taǵylymdamadan ótken úsh bilikti logoped maman qyzmet etedi. Olar osy baǵyt boıynsha tájirıbeden ótýshi stýdentterge de tálim beredi. Jalpy, pedagogıkalyq kolledjde 7 mamandyq pen 12 biliktilik boıynsha kadrlar daıarlanady.