Búgin, 22 sáýirde elordadaǵy Ulttyq akademııalyq kitaphanada belgili jazýshy-etnograf, halyqaralyq «Alash» ádebı syılyǵynyń ıegeri Tórehan Maıbastyń «Qazaq halqynyń kómeskilengen etnografııasy» atty kitabynyń tusaýkeser rásimi ótti. Ulttyq kitap kúni aıasynda uıymdastyrylǵan is-sharaǵa zııaly qaýym ókilderi, Parlament depýtattary, belgili ǵalymdar men ólketanýshylar qatysty, dep jazady Egemen.kz.
Jıyndy jýrnalıst Qambar Ahmet júrgizip, Memleket basshysynyń bastamasymen bekitilgen Ulttyq kitap kúniniń qoǵamdy rýhanı-mádenı qundylyqtarǵa baýlýdaǵy mańyzyna toqtaldy.
Kóptegen prozalyq, etnografııalyq kitaptyń avtory Tórehan Maıbas baspasóz ben ádebıet salasynda uzaq jyldan beri ónimdi eńbek etip keledi. Sonymen qatar keıingi shırek ǵasyrdan astam ýaqyt etnografııamen túbegeıli aınalysyp, bul baǵyttaǵy izdenisteri túrli jınaq bolyp jaryq kórdi. Atap aıtqanda «Elqujat», «Abadan», «Shikil», «Úshinshi aýyl», «Onynshy aýyl», «Aıbar», «Jaýhar», «Portretter» atty kitaptary, «Aıbóken» áńgimeleri men hıkaıattary oqyrmannyń oń baǵasyna ıe boldy. Sonymen qatar qalamgerdiń tańdamalyshyǵarmalary «Saryarqa kitaphanasy» jobasynan oryn aldy.
Jazýshynyń jańa kitaby Mádenıet jáne aqparat mınıstrliginiń «Mádenı murany saqtaý, zerdeleý men nasıhattaý» baǵdarlamasy boıynsha jaryq kórdi. Kitapta jurt jadynan óshe bastaǵan salt-dástúrler, kóne nanym-senimder men umytylǵan uǵymdar jan-jaqty taldanǵan.
Is-shara barysynda sóz alǵan belgili qalamger, akademık Baýyrjan Omarov, kórnekti aqyn, Memlekettik syılyqtyń laýreaty Serik Aqsuńqaruly avtordyń kópjyldyq eńbeginiń ǵylymı jáne rýhanı salmaǵyna joǵary baǵa berdi. Sondaı-aq Májilis depýtaty Ashat Aımaǵambetov ulttyq murany saqtaý memlekettik saıasattyń basym baǵyty ekenin atap ótse, tarıh ǵylymdarynyń doktory, professor Tilegen Sadyq eńbektiń tarıhı mańyzyna toqtaldy.
Saltanatty jıynda akademık Dıhan Qamzabekuly,Májilis depýtattary Nurlan Áýesbaev, Qudaıbergen Beksultanuly, Amanjol Áltaev, E.Bóketov atyndaǵy Qaraǵandy ulttyq zertteý ýnıversıtetiniń ókilderi sóz sóılep, avtordyń ólketaný men etnografııa salasyndaǵy ónimdi eńbegin aıryqsha atap ótti.
Kesh sońynda jazýshy-etnograf Tórehan Maıbas jınalǵan qaýymǵa alǵys aıtyp, tirnektep jınaǵan mol murasyn halqynyń kádesine jaratý qalamgerlikparyzy ekenin jetkizdi.