Jetisý jerinde týǵan elge degen janashyrlyqty aıshyqtaıtyn taǵylymdy bastamalar barshylyq. Aıtalyq, «Taza Qazaqstan» aksııasy aıasynda óńirdiń mektep bitirýshi túlekteri aınalany abattandyrý, tabıǵatty aıalaý is-sharalaryna bilek túre aralasyp, ózderi ósken ólkege myńdaǵan aǵash pen gúl kóshetterin syıǵa tartty.
Bıyl oblys kólemindegi 32 myńnan astam úlken ómirge qadam basqan túlekterdiń bul bastamasy aımaqtaǵy ekologııalyq mádenıet pen otanshyldyqtyń jańa úlgisine aınaldy. Aksııa barysynda 1352 aǵash pen 2389 gúl kósheti egildi. Bul tek kógaldandyrý jumysy ǵana emes, urpaqtyń týǵan jerge qaldyrǵan tabıǵı murasy ispetti. Búgingi balǵyn kóshetter kúni erteń jasyl jelek bolyp jaıqalyp, jastardyń elge degen mahabbatyn eske salyp turatyn bolady.
Taldyqorǵan qalasyndaǵy N.Ostrovskıı atyndaǵy №8 orta mektep pen B.Jolbarysuly atyndaǵy №18 orta mektepte ótken is-sharaǵa arnaıy qatysqan oblys ákiminiń orynbasary Marlen Kólbaev jastardyń bastamasyna joǵary baǵa berdi. Tabıǵatty qorǵaý bir kúndik naýqan emes, el bolashaǵyna degen qamqorlyqtyń kórinisi ekenin atap ótti.
«Tabıǵatqa janashyrlyq týǵan jerge degen súıispenshilikten bas-talady. Búgin kóshet otyrǵyzǵan árbir jas erteń eldiń damýyna da dál osyndaı jaýapkershilikpen qaraıdy. Jastardyń belsendiligi úlken úmit syılaıdy. Bul – ekologııalyq mádenıetti qalyptastyryp qana qoımaı, qoǵamdaǵy birlik pen ortaq jaýapkershilikti nyǵaıtatyn mańyzdy qadam», dedi M.Kólbaev.
Is-shara barysynda jastar aǵash otyrǵyzyp qana qoıǵan joq. «Ádep-quqyq jumysy jónindegi mentor» jobasy aıasynda uıymdastyrylǵan arnaıy dáris saǵattarynda oqýshylarǵa quqyqtyq mádenıet, qoǵamdyq tártip, azamattyq jaýapkershilik týraly keńinen túsindirildi. Túlekterdiń biri Nurqasym Mýbına kóshet otyrǵyzý olardyń mekteppen qoshtasý sátin erekshe áserli etkenin aıtty.
«Biz búgin jaı ǵana aǵash ekken joqpyz. Bul – týǵan mektebimizge, balalyq shaǵymyzǵa, týǵan ólkemizge degen alǵysymyzdyń belgisi. Jyldar óte kóshetter bıik aǵashqa aınalǵan kezde biz de ómirden óz jolymyzdy taýyp, elge paıdamyzdy tıgizetin azamat bolamyz dep senemin. Tabıǵatty aıalaý bolashaqty aıalaý ekenin búgin tereń sezindik», dedi jas túlek.
Ekologııalyq aksııa munymen shektelmeı, Taldyqorǵan qalasynda kásiptik-tehnıkalyq bilim uıymdarynyń stýdentteri arasynda «Student CUP» shaǵyn fýtbol týrnırimen jalǵasty. Jarysqa joǵary synyp oqýshylary, kolledj, joǵary oqý oryndarynyń stýdentterinen quralǵan segiz komanda qatysyp, tartysty oıyn órnegin kórsetti.
Jalpy, óńirde 9 saıabaq, 1 skver, 2 alleıa abattandyryldy. Byltyr óńirde 21 jasyl aımaq jańartyldy. Olardyń qatarynda Eskeldi aýdany Qarabulaq aýylynda ornalasqan «Jeńis» saıabaǵy da bar. Merdiger uıymnyń jaýapsyzdyǵynan saıabaqty qaıta jańǵyrtý jumysy birneshe jylǵa sozylǵan edi. 2021 jyldan beri aıaqtalmaı kelgen qurylys jumysy oblys basshylyǵynyń tikeleı aralasýynan keıin tolyq aıaqtalyp, nysan paıdalanýǵa berildi. Endi qoldanystaǵy jasyl jelekterdi kútip-baptaýǵa, sýarý júıesin jolǵa qoıýǵa, kógaldandyrý jumysyn odan ári qarqyndy júrgizýge erekshe kóńil bólinedi. Saıabaqtyń jalpy aýmaǵy – 5,6 ga, uzyndyǵy – 1,2 km. Munda voleıbol, basketbol, fýtbol oınaýǵa arnalǵan 3 ámbebap sport alańy, 4 balalar oıyn alańy salyndy. Sonymen qatar oryndyqtar, qoqys jáshikteri men jaryq shamdary ornatylyp, jaıaý júrginshilerge arnalǵan jol tóseldi. Aýmaǵyna japyraqty jáne qylqan japyraqty aǵashtardyń, sondaı-aq butalardyń 460-qa jýyǵy otyrǵyzyldy. Budan bólek, 102 kóshe jaryǵy baǵany ornatylyp, qoǵamdyq dárethana salyndy, velojoldar men júgirý jolaqtary jasaldy. Jol bóligin abattandyrý maqsatynda 400 tonna asfalt tóselip, beınebaqylaý júıesi iske qosyldy.
«Osyndaı ádemi, zamanaýı saıabaqtyń ashylǵanyna óte qýanyshtymyz. Kún saıyn keshke nemerem Aıtóremen birge osynda kelip serýendeımiz, ózim ashyq aspan astyndaǵy jattyǵý qurylǵylarynda jattyǵamyn. Bul jer kúndelikti el jınalatyn paıdaly demalys ornyna aınaldy. Aýylymyzǵa kóńil bólip, turǵyndarǵa osyndaı qolaıly jaǵdaı jasaǵan barsha jańǵa rızamyz», deıdi Qarabulaq aýylynyń turǵyny Ryshan Áýbákirova.
Osyndaı bastamalar arqyly Jetisý jastary tabıǵatqa janashyrlyq pen qoǵam aldyndaǵy jaýapkershiliktiń úlgisin kórsetip keledi. Týǵan jerdiń tazalyǵy men kórkeıýi árbir azamattyń ortaq mindeti. Jastar ekken árbir kóshet – el bolashaǵyna degen senimniń belgisi.
Jalpyulttyq ekologııalyq aksııa aıasynda bıyl óńirde Qaratal, Kóksý, Aqsý aýdandaryndaǵy ortalyq saıabaqtardy sýarý júıelerimen birge abattandyrý, kúrdeli jóndeý jumysy júrgiziledi.
Jetisý oblysy