Shákárim ýnıversıtetinde ótken «Syńǵyrla, sońǵy qońyraý!» atty is-shara bıylǵy túlekter úshin este qalarlyq erekshe oqıǵaǵa aınaldy. Balalyq shaqtan bolashaqqa qadam basqan «Shakarim High School» mektebiniń túlekteri arasynda «Altyn belgige» úmitkerler men bilim báıgesinde topjarǵan ozattar az emes.
Shákárim ýnıversıtetiniń rektory Dýman Orynbekov kópshilikti «Sońǵy qońyraý» merekesimen quttyqtaı kele, ýnıversıtet bazasynan ashylǵan «Shakarim High School» mektebiniń basqa bilim berý nysandarynan aıyrmashylyǵyna toqtaldy.
– «Shakarim High School» mektebi – zamanaýı talaptarǵa saı qurylǵan, bolashaqqa baǵyttalǵan jańa formattaǵy bilim ordasy. Mektebimizdiń alǵashqy oqý jyly qazaqtyń bes arysynyń biri, uly oıshyl, fılosof, aqyn Shákárim Qudaıberdiulynyń 165 jyldyq mereıtoıymen tuspa-tus kelýi erekshe tarıhı ári rýhanı mánge ıe boldy. Sondyqtan mektebimiz tek bilim berý mekemesi ǵana emes, ulttyq qundylyqtardy dáripteıtin rýhanı ortalyqqa aınalyp otyr. Qazir mektebimiz úshinshi oqý jylyn tabysty jalǵastyryp keledi. Búginde 10–11 synyptarda 136 oqýshy bilim alady. Bıylǵy oqý jylynda birneshe oqýshymyz «Altyn belgi» men «Úzdik attestatqa» úmitker boldy. Bul – ustazdar men oqýshylardyń júıeli eńbeginiń nátıjesi. Basty maqsatymyz – álemdik deńgeıde oılaıtyn, kóptildi, bilimdi, ulttyq qundylyqtardy boıyna sińirgen tulǵa qalyptastyrý. Búginde mektep tek bilim beretin oryn ǵana emes, oqýshynyń qabiletin ashatyn, ómirge beıimdeıtin orta bolýǵa tıis. Sondyqtan balalarǵa akademııalyq bilimmen qatar synı oılaý, sıfrlyq saýat, zertteýshilik, kóshbasshylyq, komandada jumys isteý daǵdylaryn damytýǵa basymdyq beremiz, – dedi rektor.
Bul zamanýı talapqa tolyqtaı saı mekteptegi 10–11 synypta 136 oqýshy bilim alady. 2025–2026 oqý jylynda «Shakarim High School» mektebiniń 7 oqýshysy «Altyn belgige», 7 oqýshy «Úzdik» attestatqa támamdap jatyr.
– Mektebimizdiń basty ereksheligi – ýnıversıtet bazasynda qurylýy. Bul oqýshylarǵa ǵylymmen erte jastan aınalysýǵa múmkindik beredi. Shákárim ýnıversıtetiniń professorlyq-oqytýshylyq qura-my, jas ǵalymdary men PhD arnaıy dáris ótkizip, ǵylymı zerthanalarda praktıkalyq sabaqtar uıymdastyrady. Osy arqyly oqýshylar ǵylym men bilimniń baılanysyn tereń túsinedi. Bıyl 68 túlek mektebimizden qanat qaqqaly otyr, – deıdi mektep dırektory Baqyt Seıitqalıeva.
Shákárim ýnıversıteti 2024 jyly Abaı oblysy kóleminde 221 bilim úzdigine «Shákárim bilim granty» sertıfıkatyn berse, bıyl oblysymyzdyń 434 «Altyn belgi» úmitkerine sertıfıkat tabystady.
SEMEI