Premer-mınıstr Oljas Bektenov sıngapýrlyq «XINFA GROUP» kompanııasy basqarma tóraǵasynyń orynbasary Chjao Tınıýnmen Pavlodar oblysynda salynatyn ónerkásip parkine daıyndyq barysyn talqylady.
Búginde elimizde Prezıdenttiń tapsyrmasy aıasynda ekonomıkany ártaraptandyrýǵa ári óńdeýshi ónerkásipti qoldaýǵa baǵyttalǵan ınvestısııalyq saıasat júrip jatyr. Kezdesý barysynda jobanyń aǵymdaǵy jaǵdaıyna nazar aýdaryldy.
Chjao Tınıýn qazir jer ýchaskesi aıqyndalyp, kompanııa park qurylysyn júzege asyrýǵa jobalaý ınstıtýtyn tartqanyn atap ótti.
Premer-mınıstr memlekettik organdarǵa jalpy ınvestısııa kólemi 15 mlrd dollar bolatyn iri ınvestısııalyq jobany iske qosýǵa járdem kórsetýdi tapsyrdy. Joba óńir men tutastaı alǵanda eldiń damýyna mýltıplıkatıvtik áser etedi.
Tolyq sıkldi ónerkásip parkin qurý týraly tujyrymdamada boksıtterdi tereń óńdeý jolymen alıýmınııge aınaldyratyn joǵary ıntegrasııalanǵan óndiris qurý qarastyrylǵan. Alıýmınıı totyǵyn óndiretin kásiporyndardyń qýatyn jylyna 4,8 mln tonna, elektrolıttik alıýmınııdi 2,4 mln tonna deńgeıinde ustap turý josparlanyp otyr. Tereń óńdeý kólemi jyl saıyn 1,2 mln tonnany quraıdy. Jobany júzege asyrý 10 myń adamdy jumyspen qamtamasyz etýge múmkindik beredi. О́ndiristik nysandardyń qurylysy bıyl bastalady. 1-kezekti iske qosý 2028 jyly, jobalyq qýatqa shyǵý 2029 jyly júzege asyrylmaq.