Aqtaýda Sh.Esenov atyndaǵy Kaspıı tehnologııalar jáne ınjınırıng ýnıversıteti janynan Teńiz akademııasynyń jańa oqý ǵımaraty ashyldy. Jańa ǵımarat Yessenov University-diń jeke qarajaty esebinen salyndy. Quny 1,430 mlrd teńgeni quraıtyn úsh qabatty keshenniń jalpy aýmaǵy 4 600 sharshy metrdi quraıdy. Bul nysan 900 bilim alýshyǵa arnalǵan.
Transkaspıı halyqaralyq kólik baǵytyn damytýǵa qajetti kadrlardy daıarlaýǵa baǵyttalǵan akademııada teńiz kóligi, logıstıka, keme qatynasy jáne porttyq ınfraqurylym salalary boıynsha mamandar daıarlanyp, qoldanbaly ǵylymı zertteýler júrgiziledi. Sondaı-aq akademııa halyqaralyq deńgeıdegi zamanaýı teńiz sımýlıatorlarymen jabdyqtalǵan. Atap aıtqanda, «Kongsberg» kompanııasynyń navıgasııalyq jáne ınjenerlik trenajerleri ornatylyp, teńiz mamandaryn daıarlaýǵa arnalǵan arnaıy baǵdarlamalyq júıeler engizilgen. Bul keshender shynaıy keme júrgizý jaǵdaılaryn modeldeýge múmkindik beredi. Akademııa «Storm» kompanııasynyń trenajerlarymen, «International Maritime Organization» (IMO) halyqaralyq standarttaryna sáıkes mýltımedııalyq oqý modýlderimen jabdyqtalǵan. Júıe vahtalyq ofıserlerdi, kapıtandardy, mehanıkterdi, teńiz floty mamandaryn daıarlaıdy.
Is-sharaǵa Mańǵystaý oblysynyń ákimi Nurdáýlet Qılybaı, Ǵylym jáne joǵary bilim vıse-mınıstri Talǵat Eshenqulov, memlekettik organdardyń ókilderi, sala mamandary, professor-oqytýshylar quramy, stýdentter men teńiz salasynyń ardagerleri qatysty.
– Búgin elimiz úshin tarıhı sát. Memleket basshysy Qasym-Jomart Toqaev logıstıka jáne teńiz salasyn damytýǵa, sondaı-aq osy baǵyttaǵy kadr daıarlaý máselesine erekshe mán berip keledi. Búgingi shara – sonyń naqty kórinisi. Bul – elimizdegi teńiz salasyna arnalǵan mańyzdy joba. Mańǵystaýdyń kólik-logıstıkalyq áleýeti artyp kele jatqan kezeńde mundaı akademııanyń mańyzy zor. Osy iske atsalysqan barsha azamatqa eldiń atynan alǵys aıtamyn, – degen óńir basshysy Nurdáýlet Qılybaı jańa nysannyń óńirdiń teńiz salasyn damytýdaǵy mańyzyna toqtaldy.
Qazir Teńiz akademııasynda 350 stýdent bilim alady. Mamandar daıarlaý bakalavrıattyń 6, magıstratýranyń 4 bilim berý baǵdarlamasy boıynsha júzege asyrylady. Olardyń qatarynda keme júrgizý, keme energetıkalyq qondyrǵylaryn paıdalaný, teńiz tehnıkasy men tehnologııalary, sý kóligin basqarý jáne kólik logıstıkasy baǵyttary bar. Jańa keshen quramynda áskerı kafedra stýdentterine arnalǵan saptyq alań, qaraýyl qalashyǵy, zamanaýı kedergiler jolaǵy bar. Jańa ǵımarattyń ashylýy kúni 130-dan astam kýrsant áskerı ant qabyldady.
Mańǵystaý oblysy