Soltústik Qazaqstan oblysynda 554 myń gektar orman alqaby bar. Alaıda jyl saıyn onyń kólemi azaıyp keledi. О́ńirdegi 12 orman sharýashylyǵy otalǵan jasyl jelekti qalpyna keltirý baǵytynda turaqty túrde ekpe jumysyn júrgizip otyr. Al jekemenshikke berilgen aımaqtarda aǵash kesý faktileri jıi kezdeskenimen, ormandy qalpyna keltirý jumysy tıisti deńgeıde qadaǵalanbaıdy.
Orman alqabyna tónetin basty qaýiptiń biri – órt. Byltyr aımaqta bolǵan alapat tilsiz jaý 10 gektarǵa jýyq aýmaqty kúlge aınaldyrdy. Tótenshe jaǵdaılardyń basym bóligi astyq egetin sharýashylyqtardyń egis alqaptaryn tazartý maqsatynda saban órteýinen týyndaıdy. Máselen, jýyrda Shal aqyn aýdanyndaǵy «Asar-Sever» JShS ótken jylǵy qaldyqtardy jaǵý kezinde órt shyǵaryp, sharýashylyqqa ákimshilik aıyppul salyndy.
Oblystyq tabıǵı resýrstar jáne tabıǵat paıdalanýdy retteý basqarmasy bastyǵynyń mindetin atqarýshy Erlan Táshimovtiń málimetinshe, byltyr órt qaýpi joǵary maýsymda 1 015 reıd júrgizilgen. Sonyń nátıjesinde tutana bastaǵan 29 órttiń aldyn alý múmkin boldy. Ereje buzǵan tulǵalarǵa 37 hattama toltyrylyp, 1 mln 157 myń teńge aıyppul óndirilgen.
Sonymen qatar tilsiz jaýdyń aldyn alý maqsatynda byltyr 993,5 shaqyrym mıneraldy beldeý tartyldy. Tereńdigi 50–70 sm, eni 5–10 metr bolatyn bul jolaqtar órttiń ormanǵa taralýyna tosqaýyl bolady. Degenmen olardy únemi baqylap, ósip ketken shópter men qýraǵan qaldyqtardan tazartyp otyrý qajet. О́ıtkeni daýyl aıdaǵan qalyń órt kelip jetse, tazartylmaǵan beldeýdegi shóp-shalam da tutanyp, jalyn ormanǵa lap qoıýy múmkin. Sondyqtan qara topyraǵy ǵana qalatyndaı etip, beldeýlerdi turaqty túrde kútip ustaý mańyzdy. Byltyr bul jumys 26 900 shaqyrym aýmaqta júrgizilgen.
Qazir orman sharýashylyqtarynyń materıaldyq-tehnıkalyq bazasy birtindep nyǵaıyp keledi. Byltyr óńirdegi orman sharýashylyqtarynyń órtke qarsy daıyndyq deńgeıi 10 baldyq júıe boıynsha 6,9 balǵa baǵalandy. Búginde aımaqta 21 órt sóndirý kóligi, 13 stansa, 129 traktor jáne 27 órt sóndirý kesheni saqadaı saı tur.Bıyl qolǵa alynǵan «Aýyl qutqarýshylary» baǵdarlamasy aıasynda oblystyń 11 núktesinde arnaıy toptar qurylyp, 78 adam órt sóndirý tásilderine mashyqtandy. Bul jasaqtar negizgi kúsh jetkenge deıin tilsiz jaýdyń betin qaıtarýǵa septigin tıgizedi.
Jasyl ormandy órtten qorǵap, onyń kólemin arttyrý – tabıǵatqa degen janashyrlyq pen eldik jaýapkershiliktiń mańyzdy kórinisi.
Soltústik Qazaqstan oblysy