Elimizde Prezıdent Jarlyǵyna sáıkes 2026 jylǵy 17 naýryz ben 30 maýsym aralyǵynda ótetin kóktemgi áskerge shaqyrý naýqany jalǵasyp jatyr, dep habarlaıdy Egemen.kz.
Qorǵanys mınıstrliginiń málimetinshe, 1 maýsymdaǵy jaǵdaı boıynsha Qarýly kúshterdi, sondaı-aq UQK Shekara qyzmetin, Memlekettik kúzet qyzmetin jáne Tótenshe jaǵdaılar mınıstrligin jasaqtaý jospary tolyq kólemde oryndalǵan.
Bas shtabtyń Uıymdastyrý-jumyldyrý jumystary departamentiniń málimetinshe, jańa shaqyrylǵan sarbazdardyń basym bóligi jas sarbazdar kýrsyn aıaqtap úlgergen. Olar jalpy áskerı jarǵylardy meńgerip, saptyq jáne atys daıyndyǵynyń negizderin oqyp, qarý-jaraqtyń taktıkalyq-tehnıkalyq sıpattamalarymen tanysqan.
Qazirgi ýaqytta merzimdi qyzmettegi sarbazdar áskerı ómirge beıimdelip, óz mindetterin atqarýǵa kirisken. Nesıe mindettemeleri bar áskerı qyzmetshiler zańnamaǵa sáıkes tólemderin keıinge qaldyrý múmkindigin paıdalanyp jatyr. Sonymen qatar, olardyń bir bóligi qyzmetti aıaqtaǵannan keıin memlekettik bilim berý granttaryna arnalǵan konkýrsqa qatyspaq.
Estonııada áıelder áskerge shaqyrylýy múmkin
El óńirlerinde ákim orynbasarlarynyń basshylyǵymen qalalyq jáne aýdandyq áskerge shaqyrý komıssııalary jumysyn jalǵastyryp jatyr. Negizgi kúsh Ulttyq ulan bólimshelerin jasaqtaýǵa baǵyttalǵan, josparǵa sáıkes onyń qataryna 7 myńnan astam jas shaqyrylmaq.
Azamattarǵa shaqyrý SMS-habarlamalar jáne eGov portaly arqyly elektrondy formatta, kelý kúnine keminde úsh kún qalǵanda jiberiledi. Elektrondy habarlama resmı shaqyrý mártebesine ıe. Shaqyrtý alǵan azamattar áskerge shaqyrý pýnktine kelýge mindetti, al dáleldi sebepsiz kelmegen jaǵdaıda ákimshilik, al áskerden jaltarǵan jaǵdaıda qylmystyq jaýapkershilik qarastyrylǵan.
Jalpy kóktemgi áskerge shaqyrý aıasynda Qarýly kúshter men basqa da áskerı qurylymdarǵa 18 ben 27 jas aralyǵyndaǵy 21 myńnan astam azamat shaqyrylady.
Eske sala keteıik, 2014 jyldan beri Qazaqstannyń 900-den astam áskerı qyzmetshisi BUU mıssııalaryna qatysqan.