Aqordada Qazaqstan Prezıdenti Qasym-Jomart Toqaevtyń tóraǵalyǵymen Halyqaralyq Araldy qutqarý qory quryltaıshy memleketter basshylary keńesiniń otyrysy ótti, dep habarlaıdy Egemen.kz.
Memleket basshysy Qyrǵyzstan, Tájikstan, Túrikmenstan jáne О́zbekstan kóshbasshylaryna sammıtke qatysqany úshin rızashylyǵyn bildirdi.
«Búgingi kezdesý óńirdi ornyqty damytý qaǵıdattaryna, pragmatıkalyq jáne ózara kelisilgen ekologııalyq kún tártibin ilgeriletýge beıil ekenimizdi rastaıdy. Osy jıynda Qordyń damý perspektıvasyn talqylap, Aral teńizi basseıniniń ekojúıesin saqtaýdy kózdeıtin ortaq sheshimderdi aıqyndaımyz. Bul keń aýqymdaǵy halyqaralyq másele bolǵandyqtan, bizdiń jumysymyzǵa kóptegen memleketter, halyqaralyq uıymdar nazar aýdaryp otyr. Araldy qutqarý máselesi kóp jyldar boıy aımaqta da, álemde de aıtylyp keledi. О́ńirdiń turaqtylyǵyn qamtamasyz etý jáne órkendetý – ortaq ári qol jetkizýge bolatyn mindet. Atalǵan basqosý yntymaqtastyqty nyǵaıtýǵa tyń serpin berip, aımaq memleketterine paıdasyn tıgizedi dep úmittenemin», dedi Qasym-Jomart Toqaev.
Qasym-Jomart Toqaev: Biz úshin ekologııalyq qaýipsizdik uzaqmerzimdi damý strategııasynyń arqaýy
Prezıdent Halyqaralyq Araldy qutqarý qory Ortalyq Azııadaǵy sý sharýashylyǵy men ekologııalyq máselelerdiń sheshimin tabý úshin óńirdegi memleketterdiń kúsh-jigerin ortaq arnaǵa uıystyratyn birden-bir ınstıtýsıonaldyq platforma ekenine toqtaldy
«Qor Aral teńizin qutqarýǵa baǵyttalǵan halyqaralyq qoldaý sharalaryn shoǵyrlandyryp, birlesken bastamalardy iske asyrýda aıtarlyqtaı ról atqarady. Qazaqstan Qorǵa tóraǵalyq etý barysynda barlyq quryltaıshy memleketterdiń qatysýymen kóptegen ózekti mindetterdiń sheshimin tabýǵa dáıekti túrde yqpal etti. Mysaly, sý-energetıka salasyndaǵy yntymaqtastyq nyǵaıyp, jobalardy qarjylandyrý tetikteri keńeıip keledi. Qordyń Atqarýshy komıtetiniń úılestirý qyzmetin arttyrý jóninde sharalar qabyldandy. Halyqaralyq áriptestermen, sonyń ishinde BUU qurylymdarymen, qarjy ınstıtýttarymen jáne donorlarmen yqpaldastyq kúsheıýde. Halyqaralyq tabıǵatty qorǵaý bastamalary aıasyndaǵy jumys jandandy. Qordyń Atqarýshy komıteti birqatar mańyzdy jıynǵa, atap aıtqanda, Rııad qalasynda ótken One Water sammıtine, Naırobıde uıymdastyrylǵan BUU-nyń qorshaǵan orta jónindegi 7-shi Assambleıasyna, sondaı-aq Bakýdegi SOR-29 jáne Belendegi SOR-30 konferensııalaryna qatysty. Aral teńizi basseınindegi elderge kómek kórsetý jónindegi is-qımyl baǵdarlamasyna jáne Ortalyq Azııanyń turaqty damýy úshin qorshaǵan ortany qorǵaý jónindegi О́ńirlik baǵdarlamasyna jiti nazar aýdarylyp otyr. Sonymen qatar halyqaralyq uıymdardyń qatysýymen 30-dan asa óńirlik joba júzege asyrylýda. Atalǵan baǵdarlamalar men bastamalardy qarjylandyrýdyń jalpy kólemi eki mıllıard dollardan asady. Qazaqstannyń Dúnıejúzilik densaýlyq saqtaý uıymymen seriktese otyryp ázirlegen 2026-2029 jyldarǵa arnalǵan О́ńirlik jol kartasy Aral mańy turǵyndarynyń densaýlyǵyn jaqsartýǵa jáne ál-aýqatyn arttyrýǵa úles qosady», dedi Memleket basshysy.