Qazaqstanda jasandy ıntellektti paıdalana otyryp túsirilgen fılmderge arnalǵan alǵashqy halyqaralyq Astana AI Film Festival (AAIFF 2026) kınofestıvali ótedi. Elordada ótken baspasóz konferensııasynda jobanyń tujyrymdamasy men ótinim qabyldaý tártibi tanystyryldy, dep habarlaıdy Egemen.kz.
Uıymdastyrýshylardyń aıtýynsha, festıvaldiń negizgi oqıǵasy jasandy ıntellektpen ázirlengen qysqametrajdy fılmderdiń halyqaralyq baıqaýy bolmaq. Oǵan álem elderiniń kreatorlary tájirıbesine de, kásibı stýdııasynyń bar-joǵyna da qaramastan qatysa alady.
«Astana AI Film Festival kreatıvti ındýstrııadaǵy jyl saıynǵy mańyzdy oqıǵaǵa ári jańa formattar men jańa esimderge arnalǵan turaqty halyqaralyq alańǵa aınalady dep kútilýde. Bul rette qatysý barlyq nıet bildirýshiler úshin ashyq: ótinimder komandalardan da, jeke kreatorlardan da qabyldanady», dedi festıval uıymdastyrýshylarynyń biri, Ozen kompanııasynyń negizin qalaýshy Aızatýlla Hýsseın.
Teatr, kıno jáne dıalog: Astanada Reseıdiń mádenıet kúnderi ótedi
О́tinim qabyldaý 2026 jyldyń mamyr aıynda bastalady. Týyndyny festıvaldiń resmı saıty arqyly joldaýǵa bolady.
«Baıqaý sharttaryna sáıkes, qatysýshylar uzaqtyǵy 10 mınýtqa deıingi qysqametrajdy AI-fılm ázirlep, ony jobanyń sıpattamasymen birge festıvaldiń lendıng-platformasyna júkteýi tıis. О́tinimder mamyr aıynan tamyz aıynyń sońyna deıin qabyldanady», dep atap ótti festıval uıymdastyrýshysy, Brave Talents kompanııasynyń jetekshisi Almas Jalı.
Eske sala keteıik, Astana AI Film Festival 2026 jyldyń kúzinde ótedi. Festıval kınoındýstrııa men AI-tehnologııalardyń toǵysyndaǵy jobalarǵa arnalǵan alańǵa aınalyp, avtorlardyń, digital-kreatorlardyń, tehnologııalyq kompanııa ókilderiniń, sarapshylar men ınvestorlardyń basyn qosady.
О́z segmentindegi eń iri festıvalderdiń birine aınalýdy kózdeıtin jobanyń jalpy júlde qory 1 mıllıon AQSh dollaryn quraıdy. Joba demeýshilik jáne seriktestik qarajat esebinen júzege asyrylmaq.
JI kómegimen jasalǵan mýltfılm kınoteatrdan kórsetildi
Festıval aıasynda kórsetilimder, AI-kontentke arnalǵan konferensııa, sondaı-aq avtorlar men prodıýserlerge arnalǵan pıtch-sessııalar ótkizý josparlanǵan.