Qypshaq arýy!
Dúr Ana!
Qutty qursaǵy!
Kezdestik.
Meniń Kún shaǵym, Onyń gúl shaǵy!
Bilekteı burym tartylǵan qustyń
jolyndaı,
Tisteri marjan, teńizdiń kúmis burshaǵy!
Deshtiniń qyzy!
Dúrııadan kıgen kóılegin,
Oqasyn tesip ótkendeı edi oı kógim!
Aldyna baryp, shymyldyǵynyń
syrtynda,
Arýaǵym asyp, rýhtyń tilinde sóıledim!
Qypshaq arýy –
Álemniń ázız begimi!
Kókte Haq Uly, sonan soń Jerde
Sen Uly!
Kindigin kesip, kir jýǵan jýsan dalada,
Úze ózen men Azaý teńizdiń kelini!
Súıegi altyn sardardyń ǵana serigi!
Júzin jel, kórkin Kún súıip
áli kórmegen,
Dıdaryn aıtyp, kómeıden tóktim
kólge óleń!
Kún túbi jortyp, joryqta rýhy ólmegen,
Segiz ǵasyrdy ysyryp tastap kóldeneń,
Tas balbaldardy dalaǵa erttim kórmeden!
Qypshaq arýy!
Han ulyn súıdiń
Sen de asyp,
Bedizshi sultan, bekterden asyp
Men ǵashyq!
Kele jatyrsyń qypshaq dalasyn
Sen basyp,
Bara jatyrmyn Joshynyń jurtyn
Men basyp,
Segiz ǵasyrdyń keýdesin erke
jelge ashyp!
Qypshaq arýy!
Umaı qyz tekti!
Aq Ana!
Sezimiń úshin shúberek janym sadaǵa!
Tas balbaldardy ertip áketem, jan aǵa,
Qypshaqtyń qyzyn ertip áketem dalama!
Mıras ASAN
QARAǴANDY