Qazaq áıelderiniń bolmysyn qapysyz beınelegen Ámına О́mirzaqova apamyzdyń kúlkisin qalaı umytarsyń?! Áıgili aktrısa rııasyz rahattanyp kúlgende álem onyń shapaǵatyna shomylyp turǵandaı bolmaýshy ma edi? Ulttyq kınematografııanyń dara kelbetiniń eń shynaıy sátin máńgilikke este qaldyrǵan bir adam bolsa, ol - qorjynynda talaı qazynasy bar qyzylordalyq fototilshi Bolat Omarálıev.
Fototilshi Ámına apamyzdyń kúlkisin túsirý úshin biraz ábigerge túsken kórinedi. Ǵajaıyp rólderin aıtpaǵanda, eń alǵashqy Lenıngradta ótken Búkilodaqtyń kınofestıvalde «Eń úzdik áıel róli» ataǵyn jeńip alǵan aktrısanyń shynaıy kúlkisin túsirip alý úshin fototilshi ony Qyzylordaǵa gastroldik saparmen kelgen saıyn ańdıdy.
– Keı sýretterdi men kópshilikke endi kórsetip júrmin. Kezinde jarııalana qoımady. Al myna sýretti aktrısanyń ózine kórsetýdiń múmkindigi bolmady. Ol kisi Qyzylordaǵa kelgen saıyn kórermenderimen kezdesip, qaýqyldasyp, tamasha kezdesýler ótkizýshi edi. Oǵan qosa kezinde «Qazaqfılm» kınostýdııasy Qyzylorda óńirinde Ámına О́mirzaqovanyń qatysýymen kórkem fılm túsirdi. Ol kisi basty rólde oınady.
Men apaıdyń kúlgende ar jaǵynan júregi kórinetin sátin túsirip alamyn dep, dalada bir saǵattaı júrdim. Jıyn aıaqtalyp, aktrısa syrtqa shyǵa bergende, mektep aldyndaǵy bir balanyń qylyǵyna rahattana kúldi de, tisteri jarq ete qaldy. Men fotoapparatty shyrt etkizip úlgerdim. Jalpy, Ámına apany Qyzylorda óńirine kelgen saıyn túsirip júrsem de, shyǵarmashylyq maqsatym oryndalǵany osy edi.
Negizi ártisterdi fotoǵa túsirý ońaı, qalaǵan beıneńdi somdap beredi. Biraq, shynaıylyqty fotoobektıvte ustap qalý óte qıyn, – deıdi fototilshi.
Aınash ESALI,
«Egemen Qazaqstan»
ALMATY