Áıelder merekesi qarsańynda Qostanaıda qyz-kelinshekterdiń «Rýlde arýlar» atty avtosherýi ótti. Oblystyq jastar resýrsy ortalyǵy bastap, jergilikti polısııa qyzmeti qostap ótkizgen bul sharanyń basty maqsaty – kólik júrgizýshi áıelder tarapynan jol erejesiniń buzylmaýyn nasıhattaý jáne merekege tartý, jańashyldyqqa, batyldyqqa, sulýlyqqa qurmet bolatyn.
Mundaı sherý Keńes Odaǵy tusynda 1936 jyly ótkizilgen eken. Oǵan «ZIL» júk mashınasyn júrgizetin 45 áıel qatysypty. Al biz búgin áıelder eń saq, jol-qozǵalys erejesin buljytpaı oryndaıtyn júrgizýshiler ekenin kórsetemiz, – dedi oblystyq jastar resýrsy ortalyǵynyń bólim jetekshisi Snejana Shandr.
Áıel júrgizýshiler otyrǵan kólik sherýiniń taǵy bir ereksheligi, mashınalardyń barlyǵy onyń ıesiniń qııaly jetken jerge deıin bezendirildi. Olar mashına arqyly túrli obrazdar jasaýǵa tyrysty. Sáýkele «kıgen», mýltfılm keıipkerlerimen, 8 naýryz ben júrekshelerdi kórsetken mashınalardan joldaǵy júrginshiler kózin ala almady.
– Rýlge qyzdar men kelinshekter otyrǵan mashınalar sherýiniń ádemiliginde shek bolǵan joq. Biz nusqaýshy aıtqan ereje sheginen shyqpaı, júrip otyrdyq. Barlyq mashınalar bizge qurmetpen dabylyn qosyp jatty. Mashınany túnimen otbasymyzben bezendirdik. Qazir mashına rýlinde otyrý áıelder úshin sán emes, bul kúndelikti tirlikte óte kerek, – deıdi sherýge qatysqan Adına Qalıeva.
Avtosherýge 23 mashına qatysty. Baıqaýdyń sońynda demeýshiler qyz-kelinshekterdi merekesimen quttyqtap, olarǵa syılyqtar tabys etti. Jastar resýrsy ortalyǵynyń volonterleri endi mundaı avtosherýdi jyl saıyn ótkizýdi oılap otyr.
Názıra JÁRIMBETOVA,
«Egemen Qazaqstan»
QOSTANAI