Tolaǵaılar tartysy

Syr eline tolaǵaılar keldi. Álemniń bar temir-tersegin basy­nan asyryp tastaı salatyn sań­laqtar Qyzylordada aýyr atletıkadan Qazaqstan Respýb­lıkasynyń kýbogy men chempıonatyn sarapqa saldy. El sheń­berindegi eń eleýli jarysqa áıelder men erler qu­ramasynyń barlyq ókili qatysty. Bes kúnge sozylǵan jarysta Astana, Almaty qalalarynan jáne oblys ortalyqtarynan 14 komanda kelip, 150 ziltemirshi kimniń myqty ekenin anyqtady. Jyldaǵy dástúr boıynsha 105 keli salmaq dárejesinde jeńimpaz atanǵan sportshyǵa aqshalaı syılyq pen Ilıa Ilın atyndaǵy kýbok tabys­taldy. Bıylǵy básekede bul atalymdy qyzylordalyq Rústem Sybaı jeńip aldy. Solaısha, ol kýbok pen sertıfıkat ıegeri atandy. Jarys qorytyndysy boıynsha komandalyq esepte Almaty oblysynyń erler quramasy top jardy. Al Qyzylorda oblysynyń komandasy ekinshi oryn ıelense, Shyǵys Qazaqstan oblysy úshinshi oryndy enshiledi. Áıelder arasynda Almaty qalasy jeńimpaz atansa, qalǵan oryndardy Almaty oblysy men Shyǵys Qazaqstan oblysynyń komandalary ózara bólisti. Jekeleı jattyǵýlarda 48 kılo boıynsha almatylyq Iýlııa Po­tasova jeńimpaz atandy. Ol jalpy esepte 145 kılo salmaqty kóterip dara shyqty. Odan keıingi oryndar da ońtústik astanadan kelgen qyzdarǵa buıyrdy. Gúlnur Ybyraı men Natalıa Berdıktiń arasyn bir ǵana kılo bólip turdy. 53 kılo salmaq dárejesinde Ásel Amangeldi altynnan alqa taǵyn­sa, Aleksandra Lachkova kúmis, Aqmaral Úrgeshbaeva qola júldeni ıelendi. Sáýle Sádýaqasova, Lı­dııa Anýfrıeva men Mádına Asta­mırovalar 58 kılo salmaqtaǵy júldelerdi bólisti. 63 kıloda qyzylordalyq Ásem Sadyqova je­ńimpaz tuǵyryna kóterilse, odan keıingi oryndarǵa Eka­terına Dolgıh pen Elızaveta Beloýsova jaıǵasty. 69 kılo dáre­­jesinde Maıra Faızýllaeva qarsylastarynan qara úzip shyqty. Ol jalpy qorytyndy esepte 210 kılo salmaqty baǵyndyrdy. Ekinshi oryndy alǵan Anjela Chalkarova 193 kılony kóterdi. Ekaterına Bykova bolsa, 178 kılomen úshinshi orynǵa turaqtady. 75 kılodaǵy Raýshan Meshithanova tipti úlken nátıje kórsetti. Ol 212 kılo ziltemirdi basynan asyryp tas­taı salyp, altyn júl­dege qol sozdy. Odan keıingi oryndy ıelengen qyzylordalyq Dılıara Pirjanova 152 kılo salmaqty ǵana baǵyn­dyrdy. О́skemennen kelgen Anelıa Sýmbembaeva 146 kılomen qola júldeni qanaǵat tutty. Esesine 90 kılodaǵy qyzdar qol soǵarlyqtaı nátıje kórsete almady. Bul sal­maqta birinshi oryndy alǵan Valerııa Dejına bar-joǵy 185 kılo salmaqty kótere aldy. Ekinshi jáne úshinshi oryndy ıelengen Nu­raı Qasenaly men Indıra Keńes­bekovanyń da nátıjeleri budan áldeqaıda tómen. Asa aýyr salmaqtaǵy qyzdardyń básekesi birshama shıelenisti boldy. Ná­tıjesinde, Ońtústik Qazaqstan ob­lysynyń atleti Aleksandra Abor­neva 240 kılo qorytyndysymen je­ńiske jetti. Almatylyq Aızada Múptilda men Danagúl Isapa júldeli oryndardy ózara bólisti. Erler arasyndaǵy báseke adam qanyn qyzdyratyn, jan­kúıerlerdiń delebesin qozdyratyn negizgi syn ǵoı. Sondyqtan, jeńil salmaqtan bastap jigitter jarys kórigin qyzdyryp sala berdi. 56 kılo salmaqta qyzylordalyq Almat Asanhanuly top jardy. Ol 203 kı­lo­ny ba­ǵyndyrdy. Qostanaılyq Aıan Baızaqov qarsylasynan bir kıloǵa ǵana kem kóterip, kúmispen kúpteldi. О́skemendik Rahat Bı­sembaev qola júlde ıegeri atandy. 62 kılo salmaqtaǵy Syr eli úmit kútken sportshylardyń biri Ádilbek Balahaev almatylyq Igor Sonnan 10 kılo kem kóterip, ekinshi orynǵa turaqtady. Bul salmaqtaǵy qola júlde de qyzylordalyq Erbolat Jolamanovqa buıyrdy. 69 kılo dárejesinde Mıhaıl Drozdov, Aleksandr Kım, Aıdos Tur­synbaı úshtigi júldegerler qatarynan kórindi. 77 kıloda Albert Lınder altyn alsa, Aıdar Qazov kúmis, Andreı Snegýrov qola júldeni qanjyǵasyna basty. 85 kılo dárejesinde taǵy bir Lın­der áýletiniń balasy Se­men top jardy. Ol ekinshi oryn alǵan Medet Júndibaevtan 34 kılo salmaq artyq kóterdi. Bul salmaqta qaraǵandylyq Kırıll Staroverkın 290 kılomen úshinshi oryndy ıemdendi. 94 kılo sal­maqta Aıbek Jáni­bekov dara shyq­sa, Aıat Ámir­bekov pen Dáýlet Myr­zahmetov odan keıingi oryn­darǵa turaqtady. Dańqty Ilıa batyrdyń salmaǵynda Rústem Sy­baıdyń erekshelengenin sóz basynda aıttyq. Ol 377 kılo salmaqty kó­terdi. Álıhan Shaıhıddınov 341 kılo, Ildar Mınnııarov 330 kılony baǵyndyryp, júldegerler qatarynan tabyldy. Asa aýyr sal­maqtaǵy básekede Ibragım Ber­­­sanovqa jeter eshkim bolmady. Jalpy, qorytyndy boıynsha 367 kılo salmaqpen birinshi oryndy ıelendi. Degenmen, bul ózinen sal­maǵy jeńil Rústem Sybaıdyń kór­setkishinen 10 kıloǵa tómen eke­nin aıta ketken jón. Evgenıı Ko­les­nıkov pen Igor Polozovtyń da nátıjesi kóńil kónshiterlikteı emes. Biraq, ekinshi jáne úshinshi oryn­dy ıelenýge múmkindikteri jetti. Sonymen, bes kún boıyna so­zylǵan baıraqty báse­ke óz máre­­sine jetti. Endi jeńim­pazdar­dan jasaqtalǵan el quramasy Ash­ǵabadtaǵy Azııa chempıonatyna daıyn­­dyqty bastap ketti. Erjan BAITILES, «Egemen Qazaqstan» QYZYLORDA